Fene despedirá o ano coa II Carreira San Silvestre na que reeditará o concurso de disfraces

O alcalde de Fene, Gumersindo Galego, presentou esta mañá a segunda edición da Carreira San Silvestre. Cita deportiva coa que o municipio despedirá o ano. No acto tomaron parte a edil de área, Rocío Bértoa, e o atleta local e gañador da última carreira 10K de Fene, Santi García. O rexidor explicou que se celebrará o 31 de decembro, a partires das cinco e media do serán. Aberta á participación de vecinos e visitantes sen límite de idade nin mínima nin máxima, Gumersindo Galego recordou o éxito tanto de participantes como de organización da primeira edición. Éxito que confía en igualar ou incluso mellorar. E, neste sentido, quixo invitar a todos e todas a sumarse á carreira e disfrutar desa xornada practicando deporte en boa compaña.

A concelleira Rocío Bértoa explicou que a intención do Concello é consolidar este tipo de carreiras no municipio, convertíndose en referente na comarca. Para iso, propónse un percorrido apto para todos os públicos, duns catro ou cinco quilómetros, e que discurrirá polas parroquias urbanas de Fene e Perlío. Os detalles do rueiro daránse a coñecer próximamente, aínda que Bértoa xa avanzou que partirá novamente da praza do Concello.

Explicou que os nados en 2007 e anos precedentes deben formalizar a súa inscripción na páxina da Federación galega www.carreirasgalegas.com e abonar unha cuota de tres euros. O prazo pecharáse o mesmo día da cita, unha hora antes na casa consistorial. Aqueles que nacesen en anos posteriores non precisan anotarse na carreira. Así mesmo, reeditaráse o concurso de disfraces, polo que aqueles que se animen e se fotografíen no photocall que se instalará no salón de plenos optarán a diferentes premios. Por último, sinalou que os interesados poden consultar o regulamento tanto na páxina municipal www.fenecidadan.net como na da federación galega.

Pola súa banda, Santi García, que confirmou a súa presenza na carreira, aproveitou a ocasión para animar á veciñanza e, sobre todo aos máis novos, a participar da Escola Municipal de Atletismo posta en marcha recentemente pola Concellería de Deportes de Fene co ánimo de recuperar esta práctica no municipio dende idades xa temprás.