Continúa a sobrecarga nas urxencias do Chuvi

 A executiva comarcal da Federación de Sanidade de CC.OO. en Vigo volveu denunciar o colapso nos servizos de urxencia dos hospitais do Chuvi, e asegurou que seguen sobrecargados”.

Segundo sinalaron nun comunicado responsables do sindicato, este luns a última hora da mañá, o servizo de urxencias do Xeral tiña 20 pacientes pendentes de ingreso, “dos que soamente tres tiñan asignada cama”, pero que non podían ser ingresados ata as 17,00 horas.

No caso do Meixoeiro, o sindicato sinalou que había 16 pacientes en observación e “os corredores sobrecargados”, tres enfermos pendentes de ingreso da noite anterior e que todo iso obrigou a reforzar o persoal de enfermaría.

Ante esta situación, CC.OO. denunciou a “presión” á que “están a ser sometidos os profesionais”, así como a “espera” que deben soportar os pacientes. Ademais, advertiu de que estará “moi alerta” ante un eventual aumento de pacientes debido ao intenso frío previsto para estes días.