Cinco establecementos dos 109 participantes chegan á final do Concurso de Escaparatismo de Nadal na Coruña

O xurado do Concurso de Escaparatismo de Nadal organizado pola Concellaría de Emprego e Empresa, que dirixe Luisa Cid, co obxectivo de dinamizar o comercio coruñés elixiu por unanimidade aos cinco finalistas do certame tras visitar os 109 establecementos inscritos. Foi a edición máis participativa da historia do certame ao superar en 19 locais comerciais á de 2013.

Os finalistas son Víctor Ares, da Asociación Distrito Mallos; Metrópoliscomic Coruña, da Asociación de Comerciantes Fernández Latorre-Catro Camiños; Confeitaría Chana Tartamóvil, da Asociación de Comerciantes Castrillón, Eirís e Monelos (ACOCEM), Migas Dulces Bocados, da Asociación Monte Alto, e Mamamala, de Obelisco.

Os cinco escaparates foron seleccionados de entre os 109 comercios que participan no concurso por un xurado de expertos que valoraron a orixinalidade, a estética e a eficacia comercial, entre outros factores. Agora, o certame pasa a unha segunda fase na que o gañador será elixido por votación popular. Así, entre o 16 e o 30 de decembro todo o que o desexe poderá votar ao seu favorito na páxina web www.coruñawapa.es.

O establecemento gañador recibirá 3.000 euros e 1.000 euros cada un dos outros catro finalistas. Tamén serán premiadas as asociacións de comerciantes ás que pertenzan os comercios con 500 euros cada unha. Os locais inscritos no concurso son moi representativos do comercio dos barrios da cidade, xa que pertencen a 17 asociacións comerciais.

APOIO AO COMERCIO

O Concello convoca o Concurso de Escaparatismo de Nadal para apoiar, formar, incentivar e premiar aos comerciantes que co seu esforzo buscan ofrecer a mellor imaxe dos seus negocios, achegando un valor engadido o comercio local e buscando a fidelización do cliente.

Estes certames forman parte do plan de revitalización do comercio impulsado polo Goberno local en colaboración co sector. Este ano, a Concellaría de Emprego e Empresa celebrou dous concursos de escaparatismo: o de outono, no que participaron 80 comercios e 10.000 euros en premios, e o de Nadal. Entre ambos os certames rexistráronse un total de 189 participantes, superándose todas as cifras de participación de anos anteriores.