Centos de persoas concéntranse para recordar a Vanesa Lage ante a Comisaría de Vigo

Concentración ante a Comisaría de Vigo

Centos de persoas, entre os que estaban axentes do Corpo Nacional de Policía, da Policía Local, Garda Civil, membros de Protección Civil, sanitarios de emerxencias, empregados de Abanca, políticos e cidadáns, concentráronse este mércores a mediodía ante a entrada da Comisaría de Vigo para render homenaxe a Vanesa Lage, a axente falecida o venres nun atraco, e para desexar unha pronta recuperación ao seu compañeiro Vicente A.B., que segue hospitalizado.

Unha subinspectora da Comisaría leu un comunicado (tras o que se gardou un minuto de silencio, seguido dun pechado aplauso) no que, visiblemente emocionada, lamentou que Vanesa Lage “deixou un oco” entre os seus compañeiros que non poderá esquecer. Así mesmo, tivo palabras para a familia da falecida, á que agradeceu que brindara á Policía a “sorte” de poder compartir o seu labor “cunha excelente compañeira”.

No comunicado, a Policía tamén apuntou que segue “con esperanza” a recuperación do subinspector Vicente A.B. (que xa está consciente, tras saír da coma inducida), e recordou que os seus achegados forman parte da “familia policial”. Finalmente, o equipo policial agradeceu o “cariño e apoio” dos seus concidadáns, que os fai sentir “orgullo” do servizo que presta e seguirán prestando.

Pola súa banda, o comisario principal de Vigo, Anxo González Blanco, que non quixo facer formalmente declaracións aos medios, si transmitiu o seu agradecemento aos xornalistas, cidadáns e institucións en xeral polo seu “bo comportamento” co Corpo Nacional de Policía. “Foi un pau moi forte, aínda que estamos preparados para isto. Pero hai que seguir traballando”, apuntou.

“SACRIFICIO, DOR E BÁGOAS”

O voceiro da Unión Federal de Policía (UFP), Agustín Vigo, subliñou que o Goberno “pide esforzo e sacrificio”. “Aquí ten o sacrificio, a dor e as bágoas”, proclamou, e engadiu que agora son os axentes os que piden esforzo á Administración para que “protexa aos que protexen”.

Sobre a polémica de se o subinspector ferido levaba ou non chaleco antibalas, Agustín Vigo confirmou que os sindicatos seguen á espera do informe interno que se está a elaborar, e avanzou que o próximo 10 de decembro terá lugar en Madrid unha reunión da Comisión de Seguridade, á que a UFP xa pediu por escrito que aclare esa circunstancia, así como as existencias das medidas de protección individual dos axentes.

Ademais, indicou que a seguridade non só está nos chalecos, senón tamén en medidas como plans de formación, protocolos de uso dos materiais, e outras accións para que “os policías se sintan protexidos cando están en rúa”. “Xa son 25 anos pedindo chalecos e medidas de protección, xa non hai desculpa para que non as haxa”, concluíu.

Agustín Vigo confirmou, por outra parte, que os axentes que participaron na intervención do venres (o atraco no que se produciu o tiroteo) se atopan descansando, e que a UFP pediu apoio psicolóxico para eles. O resto dos 30 integrantes da Unidade de Prevención e Reacción, á que pertencen os policías tiroteados, “non “deixaron de traballar”.

SEN DATOS OFICIAIS

Pola súa parte, o voceiro do SUP en Vigo, Víctor Vasco, tamén confirmou que non hai datos “oficiais” nin sobre as medidas de seguridade que levaba Vicente A.B., nin sobre a existencia ou non de chalecos individualizados para mulleres na Comisaría de Vigo (se os hai, cando chegaron ou por que non se repartiron).

“Do que se trata é de que isto non volva acontecer”, subliñou, e reclamou ao Goberno que faga unha “inversión” no Corpo Nacional de Policía para dotar de chalecos antibalas a todos e cada un dos máis de 65.000 funcionarios deste corpo.

Voceiros doutros corpos de seguridade, como Policía Local e Garda Civil mostraron, en declaracións aos medios, a súa solidariedade co Corpo Nacional de Policía, e fixeron súas as súas reivindicacións de máis elementos de protección. Ademais, recordaron que calquera membro destes outros corpos podería estar implicado no tiroteo, posto que, á marxe de competencias (que están ben “para os xefes), todos están na rúa e acoden a servizos cando un cidadán ou un compañeiro está en apuros.