Autorízase a instalación dun pantalán para o acceso ao Centro de Interpretación da Batalla de Rande

A Autoridade Portuaria de Vigo autorizou esta mañá a instalación dun pantalán para o acceso ao Centro de Interpretación da Batalla de Rande.

Así o acordaron hoxe o Presidente da institución olívica, Ignacio López-Chaves, e o Alcalde de Redondela, Javier Bas, tras a firma dun convenio de colaboración entre ambas as entidades.

O Concello de Redondela será o encargado de adxudicar e instalar o citado pantalán, que ocupará unha superficie aproximada de 24 metros e realizará o labor de atracada de embarcacións e embarque e desembarque de pasaxeiros, para o que contará cunha pasarela de acceso.

Este convenio é froito da gran importancia que outorga o Concello de Redondela ao turismo para o desenvolvemento económico da cidade, debido, ademais, ao elevado número de visitantes previstos ao Centro de Interpretación da Batalla de Rande, para o que necesita facilitar o acceso por mar.

Así mesmo, a Autoridade Portuaria de Vigo estima de interese que se facilite o acceso a todos os cidadáns e visitantes, sendo a zona portuaria un lugar estratéxico e ben situado para levar a cabo dita actuación, pola cantidade de turistas que se espera que visiten este Centro de Interpretación.

O Consello de Administración da Autoridade Portuaria de Vigo outorgou en xaneiro de 2012 ao Concello de Redondela unha concesión administrativa para ocupar unha superficie de 2.500 m² en Rande con destino a Centro de Interpretación da famosa batalla que tivo lugar na zona entre as armadas anglo-holandesa e hispano-francesa, no contexto da Guerra de Secesión Española, no ano 1702.