Arrinca unha nova edición do concurso de postais do Nadal da Agrupación Montexiabre

O Centro Comercial Arousa acollerá do 12 ao 20 deste mes a quinta edición do Concurso de postais do Nadal, organizado pola Asociación Social Montexiabre, e cuxo principal obxectivo é que os nenos de 5 a 13 anos descubran o sentido tradicional das festas expresando artisticamente por que se celebra o Nadal.

Para participar, os mozos terán que dar forma ás súas creacións durante as sesións de debuxo que se celebrarán o venres 12, de 17:00 h. a 20:00 h., e os sábados 13 e 20, de 11:30 h. a 13:30 h, na Sala de Xogos da 2ª planta do centro. Para iso, poden inscribirse a partir de hoxe en www.ccarousa.com, onde ademais do formulario de inscrición –estará dispoñible na pestana Concursos– poderán consultar tamén as bases do certame. Só entrarán a concurso os debuxos desenvolvidos durante estas sesións.

Temática das postais

A temática das ilustracións será obrigatoria. Os concursantes deberán recrear nas súas obras, de forma orixinal e creativa, o tradicional Belén ou Nacemento, podendo utilizar todo tipo de materiais ou pinturas para a súa elaboración –poderán traelos de casa ou empregar os que a organización poña á súa disposición nas sesións de debuxo-.

O concurso contempla dúas categorías, infantil e xuvenil, e premiará os 3 mellores debuxos presentados a cada unha delas. O xurado – integrado polo alcalde de Vilagarcía, Tomás Javier Fole; o escultor Lucas Míguez; a licenciada en Belas Artes Ángela Gil da Pena; o deseñador gráfico Álvaro Domínguez Paz; e o músico Mª Dolores Barros Galego- baseará a súa decisión no enxeño, a personalidade e a autenticidade demostrada na proposta, valorando negativamente aqueles debuxos que reproduzan persoais clásicos ou procedentes de Internet. Na decisión tamén se terá en conta a idade dos participantes á hora de avaliar o grao de dificultade do debuxo e a súa habilidade para plasmar a temática.

O nome dos seis gañadores das dúas categorías en competición -3 infantís e 3 xuvenís- darase a coñecer o vindeiro venres 26, ás 19:00 h., durante a entrega de premios que terá lugar na primeira planta do centro –corredor de exposicións-, e que estará amenizada por unha actuación de maxia.

Os premiados na categoría infantil recibirán material de debuxo e pintura (primeiro premio), un xogo para elaborar lambetadas (segundo premio) e outro para fabricar chupa chups (terceiro premio). Na categoría xuvenil serán obsequiados cunha tablet (primeiro e segundo premio) e material de debuxo (terceiro premio).

Unha vez coñecidos os gañadores, as postais presentadas a concurso exporanse no corredor de exposicións da primeira planta do centro comercial.