A Sociedade Ximnástica cumpriu no Nacional de Maratón

San Sebastián converteuse na festa do atletismo nacional, coa celebración do seu Maratón, que foi tamén Campionato de España da distancia.

Era moi complicado a priori conseguir unha medalla para os atletas da Sociedade Ximnástica pero conseguiron en meta unha brillante clasificación.

Robertas Geralavicius, non podía optar a medalla, por ter a nacionalidade de Lituania, pero na súa segunda aventura no Maratón, volveu mellorar a súa marca persoal con 2h20:32, sendo o quinto clasificado a tan só 22 segundos do terceiro posto, unha pena porque Rober fixo unha carreira de menos a máis, desde o principio foi ao seu ritmo deixando que se marchase o grupete de cabeza, pero desde o Medio Maratón foi progresando na clasificación e cando tiña ao alcance un posto de podio, xa estaba en meta. Aínda así fantástica marca a de Rober, que ademais é record da Sociedade Ximnástica.

Rubén Diz tamén fixo unha fantástica actuación conseguindo o duodécimo posto con 2h28:35, quedando quinto clasificado na súa categoría veterana de maiores de 35 anos; fixo unha carreira moi intelixente pero ao final pasoulle factura o temido muro dos 35 quilómetros, cando lle empezaron a fallar as forzas, aínda así non foi o único que se viu obrigado a baixar o ritmo de carreira e practicamente non perdeu posicións nos quilómetros finais. Unha pena cando o ano pasado correra en 6 minutos menos, esta carreira, o que lle deu unha medalla, pero tamén a sorte inflúe nunha distancia tan dura como o Maratón.