Xuventude e Igualdade de Ferrol impulsan “técnicas de contacontos aplicadas ao tempo libre”

A concelleira de Igualdade e Xuventude do Concello de Ferrol, Verónica Casal Míguez, presentou esta mañá a nova acción formativa “Técnicas de contacontos aplicadas ao tempo libre”, dirixida a mozos e mozas entre 14 e 30 anos e que se desenvolverá no mes de decembro. O prazo de inscrición abrirá o vindeiro luns, 1 de decembro e se prolongará ata o martes día 9. Os interesados en participar no curso formativo deberán presentar a súa solicitude no Rexistro Xeral e o límite de prazas é de 20 alumnos.

Casal Míguez explicou que unha vez finalizados os cursos de monitor e de director de tempo libre e estar en posesión da titulación correspondente “os novos titulados deben cursar pequenas accións formativas para complementar a súa formación de cara a unha maior especialización en determinadas áreas que lles permita mellorar as súas expectativas de empregabilidade dentro deste sector. O obxectivo desta acción formativa é promover os coñecementos necesarios nos monitores de tempo libre para a utilización das técnicas de contacontos como apoio á súa labor. “É fundamental coñecer a técnica concreta para desenvolver toda unha historia e facela próxima aos espectadores, xa que é necesario que o contacontos teña unha expresividade adecuada tanto na súa voz como de maneira corporal”, sinalou a edil ferrolá.

O itinerario formativo terá unha duración de 20 horas, cinco para os contidos teóricos e quince para os prácticos, e busca fomentar a participación activa do alumnado. Este taller de técnicas de contacontos aplicadas ao tempo libre está destinado a monitores de tempo libre así como a todas aquelas persoas interesadas en ampliar coñecementos na materia obxecto do curso. A acción formativa se desenvolverá en catro sesións ao longo do mes de decembro no Antigo Hospicio. Máis polo miúdo, as datas e horarios son os seguintes:

– Venres, 12 de decembro: de 16:30 a 20:30 horas.

–  Sábado, 13 de decembro: de 10:00 a 14:00 e de 16:30 a 20:30 horas.

– Venres, 19 de decembro: de 16:30 a 20:30 horas.

–  Sábado, 20 de decembro: de 10:00 a 14:00 e de 16:30 a 20:30 horas.