Un total de 34 condutores foron denunciados este fin de semana por superar a taxa de alcoholemia

O Concello da Coruña, a través da área de Seguridade Cidadá que dirixe Julio Flores, informa de que durante a madrugada do sábado ao domingo un dispositivo especial da Policía Local da Coruña e a Agrupación de Tráfico da Garda Civil detectou a un total de 34 condutores que deron positivo na proba de alcoholemia.

Esta acción preventiva conxunta e coordinada nas saídas da cidade da Coruña –a máis visible foi a situada en Alfonso Molina que incluía desviacións cara a Pocomaco e Universidade- deu como resultado 375 probas de alcoholemia. Delas, puxéronse a disposición xudicial por superar a taxa de 0,60 mg/litro, sete persoas polo procedemento de xuízo rápido. Así mesmo, outros 27 condutores foron denunciados por infraccións á Lei de Seguridade Viaria ao superar a taxa 0,15 ou 0,25 mg/litro.

Ademais, houbo un detido por desobediencia grave ao pretender saltarse o control e darse á fuga, chocando contra un farol na fuxida. Será denunciado ante o Xulgado de Garda por un concurso de tres delitos: desobediencia grave a axentes da autoridade, conducir vehículo a motor tendo suspendido o permiso de condución e conducir baixo os efectos de bebidas alcohólicas.

Para complementar estas accións preventivas, establecéronse controis de velocidade nos arredores da cidade da Coruña para mellorar os comportamentos dos condutores e adecuar a velocidade ás esixencias da seguridade viaria, co obxectivo de reducir o risco e a gravidade dos accidentes, coa denuncia dos condutores que circulaban por encima dos límites establecidos.

Estas accións coordinadas entre a Agrupación de Tráfico e a Policía Local da Coruña, seguiranse levando a cabo, abarcando calquera tramo horario de calquera día e estendéndose a todas as vías, co obxectivo de reducir ao máximo a condución baixo os efectos do alcol e das drogas, un dos grandes retos aos que se enfronta a seguridade viaria.