Todo preparado para o III Basket&Cheese do Club de Empresas Obradoiro

O Rio Natura Monbus Obradoiro preparou un ano máis a mesa de charlas-coloquio Basket&Cheese, que celebrará así a súa terceira edición e á que volverán estar convidados todos os membros do Club de Empresas Obradoiro.

O Hotel Porta do Camiño será o próximo 3 de decembro a partir das 19:00 horas a sede onde se darán cita os invitados deste ano, nunha actividade  titulada “Empresa&Deporte: Xuntos comunicamos mellor”, na que se debaterá sobre a importancia das relacións das entidades deportivas coa área empresarial na que inflúen e a proxección que estas poden ter nas comunicacións de ambas as partes.

Os invitados deste ano serán Juan Carlos Díaz, director comercial da liga de Fútbol Profesional; Jorge Mahía, director de Mercadotecnia e Desenvolvemento de negocio de Abanca; Joan Manel Carreiras, director de Desenvolvemento de negocio da ACB; Javier Gancedo, manager editorial da Euroliga; e Alfredo Quinteiro, especialista en mercadotecnia e eventos deportivos.

Ao final, e como vén sendo habitual desde a primeira edición grazas a Queixería Barral, patrocinador principal do evento, todos os asistentes poderán realizar unha cata de queixos da citada firma. No acto prestarán a súa colaboración tamén outras empresas do Club de Empresas Obradoiro, como  CEGA Audiovisuais, Via Romana, Air Hostess, Hotel Pazo de Altamira, Vinigal, Cabreiroá e Xoiaría Jael.