Rey Varela perdoa aos que non o creron e defende que a retirada da súa imputación lle dá a razón

O alcalde de Ferrol e presidente da Federación Galega de Municipios e Provincias (Fegamp), o popular José Manuel Rey Varela, mostrou a súa satisfacción pola retirada provisional da súa imputación no marco da ‘Operación Pokémon’ ao entender que lle dá “a razón” porque evidencia que “dicía a verdade”, ao tempo que asegurou “perdoar” a quen non le “creron”.

Nunha rolda de prensa convocada este martes no Concello, o rexedor ferrolano asegurou que esta acción vén a darlle a razón, toda vez que -remarcou- “sempre” dixo “a verdade”, que non tiña nada que ocultar” e que non “cometera irregularidades”.

Rey Varela recordou que tras a súa imputación xa manifestara que non recibira “nada” das empresas investigadas e que tampouco o seu goberno adxudicou ningún tipo de contrato ao grupo Vendex, en torno ao que xira esta suposta trama de corrupción.

O alcalde do PP tamén defendeu que “sempre” manifestou a súa “confianza” na Xustiza, ademais de poñerse á súa disposición para que “investigase todo” o relativo á súa persoa e ao seu goberno.

Tamén destacou que lle gustase que este asunto se resolvese en menos tempo, aínda que como “representante do público” entende “o lenta” que é a administración.

AGRADECEMENTOS

Rey Varela tivo palabras de agradecemento para a súa muller e o resto da súa familia e seres queridos polo “apoio e a dor” que sufriron dende que foi imputado.

Destacou que entende “a crítica” que se realiza “moitas veces” das “persoas públicas” que non son exemplares. “Pero esas persoas tamén teñen familia e somos persoas”, remarcou, ao tempo que expresou a súa convicción de que non todo é o mesmo.

Ao tempo, asegurou que “perdoa” a “todos aqueles que crían que non dicía a verdade ou que creron outras especulacións”, destacando tamén o apoio do seu goberno municipal, “de xeito incondicional” e do seu partido, o PP, “dende que se coñeceu esta noticia”.

Os grupos da oposición no Concello de Ferrol foron tamén obxecto de agradecemento por parte do alcalde “pola súa consideración” cara á súa persoa, ademais dos medios de comunicación. “A pesar do grave erro que se cometeu por parte do Servizo de Vixilancia Aduaneira”, apostilou.

A cidade de Ferrol e os seus habitantes tamén tiveron cabida no discurso do presidente local do PP nesta cidade. “Apoiáronme e nunca me perdoaría que a imaxe de Ferrol se puidese ver enturbada por un asunto destas características”, reflexionou, para engadir que se actuou “con gran respecto e atendendo aos intereses de todos os cidadáns”.

VIXILANCIA ADUANEIRA

Preguntado o rexedor acerca de se estuda emprender accións legais contra o Servizo de Vixilancia Aduaneira por errar na identificación da súa voz, o alcalde asegurou que “hoxe non é o día para valorar posibles accións”.

“Si para que Ferrol e a miña familia poidan descansar tranquilos”, resolveu o alcalde.