Rey Varela anuncia a apertura dun banco de alimentos que traballará de maneira coordinada coas entidades sociais da comarca

O alcalde de Ferrol, Jose Manuel Rey Varela, informou hoxe dos temas principais abordados na Xunta de Goberno Local celebrada esta maña na Casa Consistorial. Trátase da apertura e entrada en funcionamento do novo Banco de Alimentos da cidade e que prestará un servizo de ámbito comarcal; a adxudicación do acondicionamento da Oficina de Turismo da Praza de España; así como o contrato de servizos enerxéticos e mantemento das instalacións de edificios municipais, iluminación pública, semáforos e mellora da eficiencia enerxética do Concello de Ferrol. O primeiro edil da cidade estivo acompañado polo concelleiro de Urbanismo, Infraestruturas e Contratación, Guillermo Evia Pérez; o concelleiro de Medio Ambiente e Servizos, Borja Carro Muñoz; e a concelleira de Benestar Social, Rosa Martínez Beceiro.

O novo Banco de Alimentos, integrado na Federación de Bancos de Alimentos e xestionado pola delegación Rías Alta da Coruña, é un compromiso asumido polo Executivo que preside Jose Manuel Rey Varela e se ubicará nunha nave do polígono de A Gándara. O Concello de Ferrol achegará 20.000 euros anuais para o seu funcionamento que permitirá a distribución de alimentos a entidades sociais da cidade e a comarca. O rexedor municipal destacou os meses de traballo conxunto entre a Concellería de Benestar Social e a Federación de Bancos de Alimentos para a súa apertura, que coincidirá coa recollida de alimentos da Operación Quilo que leva a cabo en toda España a federación e que terá lugar os vindeiros venres e sábado –días 29 e 30 de novembro-. “É a culminación dun proxecto importante de apoio ás entidades que están a traballar en coordinación permanente coas persoas que peor o están a pasar” sinalou o alcalde.

Por outra banda, e no que atinxe á Oficina de Turismo da Praza de España, a empresa “Construcciones Valdoviño” se encargará da execución dun proxecto que permitirá o acondicionamento do edificio de planta baixa da Praza de España, situado preto da Biblioteca Municipal. O investimento do Concello de Ferrol nesta actuación ascende a 128.458 euros e o prazo de execución dos traballos é de 3 meses.

Novo contrato de iluminación

Noutra orden de cousas, o rexedor tamén se referiu ao prego do contrato de servizos enerxéticos e mantemento das instalacións de edificios municipais, iluminación pública, semáforos e mellora da eficiencia enerxética do Concello de Ferrol. Trala realización dunha completa auditoría para coñecer a verdadeira situación do alumeado exterior e de edificios municipais, procedeuse a un contrato co Instituto Tecnolóxico de Galicia (ITEGA) para a asistencia e o apoio técnico, e posteriormente, elaborouse un estudo de viabilidade económica e financeira do novo contrato de iluminación.

Jose Manuel Rey destacou a unificación e aforro do novo contrato “que mellorará o servizo permitindo un aforro mínimo de 300.000 euros ao ano, a dotación de novas instalacións de iluminación e eficiencia enerxética a nosa cidade e garantindo o seu mantemento”. O rexedor ferrolán tamén salientou dous puntos importantes do prego: a nova iluminación de rúas e prazas do centro de Ferrol e a iluminación de edificios de titularidade municipal como a Biblioteca da Praza de España, o Centro Cultural Torrente Ballester, o Teatro Jofre, o Auditorio de Ferrol, a Peixaría do Mercado da Magdalena ou o Pazo Municipal.

Este novo contrato de servizos enerxéticos e mantemento será de quince anos e establece un custe anual de 2,7 millóns de euros, o que permite reducir o gasto por ano actual que ascende a máis de 3 millóns de euros. A comisión informativa de Medio Ambiente, Urbanismo, Servizos e Seguridade debaterá este mércores o documento co obxectivo de aprobar o inicio do procedemento de contratación na sesión plenaria de final de mes.

Reurbanización das rúas Sol e Alegre

Por último, o primeiro edil da cidade tamén deu conta do informe de previsións sobre as obras de reurbanización que está actualmente en marcha no centro da cidade: as rúas do Sol e Alegre. Neste senso, o rexedor municipal reiterou que o obxectivo do Goberno Municipal é adiantar os prazos de execución das mesmas “somos conscientes da importancia de que estas obras non prexudiquen ao comercio e aos cidadáns”, ao tempo que avanzou que a previsión é que as conexións co centro da cidade estean operativas antes das datas de Nadal.

Jose Manuel Rey anunciou que ao longo da vindeira semana se abrirá a rúa do Sol no tramo entre Terra e Rubalcava “o que permitirá recuperar o tráfico neste último treito e sobre todo a saída ao centro pola rúa Rubalcava”. Así mesmo, durante a segunda semana de decembro se procederá á apertura do tramo comprendido entre as rúas Rubalcava e Lugo, para ao longo da terceira semana de decembro abrir o treito entre Lugo e Roi Xordo. En canto aos traballos de reurbanización da rúa Alegre, o primeiro edil da cidade avanzou que esta mesma semana se procederá á apertura ao tráfico rodado dende a praza de Canido ata a rúa Coruña. E posteriormente, na terceira semana de decembro, se finalizará o aglomerado da rotonda da praza de Canido e da avenida do Rei. Jose Manuel Rey sinalou que “o cumprimento destes prazos demostrará que se pode facer moito en menos tempo, acurtando os prazos que estaban contratados”.