Pontevedra acolle un seminario sobre sistemas de contención de vehículos e seguridade viaria

O salón de actos do Museo de Pontevedra acollerá o 13 de novembro un seminario sobre sistemas de contención de vehículos, organizado pola FEMP e a Asociación Española de Fabricantes de Sistemas Metálicos de Protección Vial (SIMEPROVI), en colaboración coas deputacións de Badaxoz, Valencia e Pontevedra.

O seminario, que vai dirixido a técnicos e responsables de entidades locais no ámbito das infraestruturas, a seguridade viaria, a mobilidade e o transporte, será impartido por Sergio Corredor Peña, director de SIMEPROVI e enxeñeiro de Portos, Camiños e Canais.

No curso, que se impartirá desde as 9:30 ata as 23:30 h, abordaranse a accidentalidade por saída da calzada  (datos, tipos de accidente, elementos de risco, tipoloxía dos sistemas de contención), os parámetros de comportamento, os criterios de implantación de barreiras de seguridade (regulamentación, análise de riscos, barreiras axeitadas para cada situación, alturas, correcta instalación, problemas particulares das redes provinciais e locais), os peitorís e exemplos prácticos.