Policía Nacional e Protección Civil mantén o operativo de procura da menor desaparecida en Vilagarcía

Policía Nacional e Protección Civil de Vilagarcía (Pontevedra) manteñen activo o operativo de procura da moza de 17 anos, residente nesta localidade arousá, que permanece en paradoiro descoñecido desde o mediodía do mércores.

A pesar de que os indicios apuntan a que se trata dunha fuga voluntaria, os servizos de emerxencias intensificaron os labores de rastrexo. Así, os efectivos de Protección Civil realizan desde primeira hora da mañá deste venres un peiteado das zonas rurais e periféricas de Vilagarcía.

Tamén a Policía Nacional intensificou a investigación, que se centra na contorna das amizades e da familia da nova. Entre outras medidas, está a procederse ao visionado de diversas cámaras de seguridade, por se a moza puidese aparecer nalgunha das imaxes.

Fontes da investigación confirmaron que existe o testemuño dunha persoa que asegurou vela a mesma tarde da súa desaparición nun barrio de Vilagarcía solicitando diñeiro, aínda que non se pode garantir ao cento por cento que se trate da menor desaparecida.

A última noticia da menor foi sobre as 14.00 horas do mércores, cando a nova, tras finalizar as clases, abandonou o instituto de Vilagarcía no que estuda 2º curso de Bacharelato.

Ese mesmo día pola mañá o pai da menor acudira ao centro de ensino para manter unha reunión coa titora e coa propia moza ante as reiteradas faltas de asistencias desta. O pai da moza desaparecida recoñece que ela se desgustou durante a reunión e mesmo rompeu a chorar. No entanto, manifesta a súa sorpresa pola situación, xa que “até agora nunca dera problemas nos estudos”.