Podemos organiza o ciclo de conferencias ‘Ence a debate’ en Pontevedra

A agrupación de Podemos en Pontevedra organizou un ciclo de charlas co lema ‘Ence a debate’, que comezará este mércores 19 ás 20,00 horas na Casa das Campás. Estas xornadas abordarán a problemática da permanencia da fábrica na ría de Pontevedra dende diversos enfoques para “xerar un xuízo crítico e fundamentado con argumentos acreditados de todos os axentes implicados”, segundo os seus promotores.

Á primeira conferencia acudirá o comité de empresa de Ence para achegar as súas “razóns para a permanencia de Ence na ría como motor de emprego”. A próxima sesión, titulada ‘Outra visión do sindicalismo ante Ence’ contará co secretario xeral da CXT Pontevedra-Arousa, Miguel Cuña, e celebrarase o martes 2 de decembro ás 20,00 horas na Casa das Campás.

‘Por un futuro de calidade, Ence fóra da ría xa’ será a charla que impartirá o presidente da Asociación pola Defensa da Ría (APDR) de Pontevedra, Antón Masa, o martes 16 de decembro. A primeira fase deste ciclo de conferencias concluirá o martes 23 de decembro co secretario da Asociación Sectorial Forestal Galega, Jacobo Feijóo, sobre ‘Retos e oportunidades do sector forestal galego no século XXI’.

Haberá un segundo bloque de charlas que se desenvolverán en xaneiro de 2015. O Círculo Podemos de Pontevedra confirmou a presenza dun biólogo mariño, representantes do colectivo Salven Pontevedra e tamén da dirección de Ence. Esta fase completaríase coa intervención de relatores vinculados ao sector marisquero e á Administración.

ASEMBLEA

Finalmente, entre febreiro e marzo completaríase o ciclo cun terceira fase dedicada a “verificar a información” achegada polos distintos axentes económicos, sociais e políticos, a celebración dunha asemblea e o pronunciamento dos seus participantes para definir un posicionamento, xa que na actualidade o Círculo Podemos de Pontevedra carece dunha postura oficial acerca da presenza de Ence en Lourizán, así como doutras problemáticas, como a construción da A-57 ou a situación da Autoridade Portuaria de Marín sobre os recheos declarados ilegais polo Tribunal Supremo.

No caso do ciclo ‘Ence a debate’, dende Podemos Pontevedra formularon unha “formulación participativa e plural” para escoitar a colectivos, entidades, dirixentes da fábrica e profesionais de distintas áreas “avalados pola súa experiencia e formación”.