Pescanova admite incertezas que desaconsellan a volta á cotización

O consello de administración de Pescanova admitiu este xoves que “subsisten serias incertezas que desaconsellan solicitar o levantamento da suspensión de cotización”, porque podería haber algún “contratempo” que impedise cumprir o plan de viabilidade da empresa.

Así o manifestou o conselleiro Diego Fontán, na Xunta de Accionistas de Pescanova celebrada na sede da pesqueira en Chapela-Redondela (Pontevedra) por mandato xudicial. Esta xunta celebrouse en cumprimento dun auto do xulgado mercantil e a petición dun grupo de minoritarios, e foi a xuíz a que determinou o día, hora e orde do día, así como a elección de Fontán como presidente da mesa.

A preguntas dun das accionistas minoritarios sobre cando volverían cotizar no Ibex as accións de Pescanova, Fontán recordou que a suspensión foi ordenada pola CNMV en marzo de 2013 e que se mantén dende entón.

Segundo Fontán, a saída do concurso de Pescanova e a aprobación do plan de viabilidade poderían ser invocadas para reclamar o levantamento desa suspensión pero, segundo recordou este conselleiro, a pesqueira ten, nestes momentos, dez filiais en concurso, que supoñen un 80 por cento do negocio consolidado do grupo, e que teñen unha débeda de máis de 800 millóns cos seus acredores.

“Esperamos un desenlace que non altere o calendario do plan de viabilidade, pero non hai certeza de que non chegue un contratempo e que non se poida cumprir o convenio (…) iso levaríanos á liquidación”, indicou Fontán.

Así mesmo, admitiu que a previsión de Pescanova é que os concursos das filiais se resolvan “a mediados de 2015”. Segundo Diego Fontán, “entón será cando se valoraría” a conveniencia de pedir que se levante a suspensión de cotización.

ORDE DO DÍA

Na orde do día da Xunta figuraba facilitar aos accionistas o informe ‘forensic’ de KPMG, aínda que o consello rexeitou a devandita petición porque as conclusións do documento xa foron postas a disposición dos accionistas e porque, obrigas de confidencialidade e segredo xudicial, fan “innecesario e improcedente” facer público o informe íntegro. Del mesmo modo, o consello remitiuse á información xa facilitada sobre o plan de viabilidade de Price Waterhouse Cooper.

O informe de KPMG desvelou as prácticas contables da anterior cúpula directiva para ocultar débeda. Ese informe desvelou que a débeda era, a decembro de 2012, de 3.281 millóns e non de 1.522 como recoñecera o grupo (que ascenderon a 2.500 millóns cando se rexistraron no CIRBE).

EXPLICACIÓNS

Con respecto ás explicacións solicitadas por accionistas minoritarios sobre por que se elixiu no seu día a proposta do consorcio Damm-Luxempart, o consello explicou que foi a mellor oferta, que cumpría criterios como a capacidade de xestión, financeira ou o coñecemento de Pescanova, e que se valorou a conveniencia de que a pesqueira tivese, na súa nova etapa, un socio industrial. “Ademais, a maioría dos traballadores manifestaron publicamente o seu apoio”, indicou o consello.

Por outra banda, na xunta someteuse a votación a modificación dos estatutos en relación con accionistas en posible situación de conflito de intereses, pero dous puntos relacionados con esta cuestión foron rexeitados.

Pola contra, a xunta deu luz verde á modificación estatutaria para pechar o exercicio social a 30 de novembro, por cuestións fiscais. Tamén se aprobou o nomeamento de EY como auditor para o período 2014-16, tras a renuncia de BDO.