Os traballadores de Cespa desconvocan a folga

Os traballadores de Cespa acordaron por unanimidade desconvocar a folga indefinida, despois de que se aprobou este venres en xunta de goberno extraordinaria recoller formalmente os cambios do prego de condicións para a nova adxudicación do servizo.

En declaracións, o presidente do comité de empresa, Alfredo Filgueiras, indicou que ás 15,30 horas, pouco despois de que finalizase a xunta de goberno e de recibir por escrito estas modificacións, os traballadores reuníronse en asemblea e acordaron por unanimidade desconvocar a folga.

Tal e como confirmou o concelleiro de Parques e Xardíns do Concello de Vigo, Ángel Rivas, na xunta de goberno aprobáronse as modificacións que pedían os traballadores, onde a máis relevante é a actualización da lista dos 110 traballadores a subrogar.

Así, Filgueiras engadiu que o novo prego incluirá non só a listaxe actualizada de todo o persoal, senón tamén as categorías, antigüidade, salario e o convenio de aplicación. Ademais, haberá un novo prazo de presentación de ofertas, que se abrirá tras a publicación do prego nos boletíns de Galicia e da provincia.

Así mesmo, ambos aseguraron que se incluirá unha matización na cláusula sobre a subcontratación do 50 por cento do servizo, na que se precisará que só afectará a medios materiais -guindastres e montacargas, entre outros- e non ao persoal.

Filgueiras trasladou que os traballadores están “contentos” coa desconvocatoria de folga, e resaltou que, con todas as súas mobilizacións, conseguiron “paralizar e modificar os pregos”. “Demostramos que o que diciamos era certo, que estaba mal redactado, que había carencias e que faltaba persoal”, concluíu.