Os Gardacostas comisan 78 quilos de ameixa babosa na ría de Ferrol

Axentes do Servizo de Gardacostas en colaboración con axentes da Policía Autonómica realizaron durante esta madrugada nas zonas da praia de Caranza, O Couto e Mugardos, na ría de Ferrol, un operativo contra o furtivismo que se saldou coa identificación de 3 persoas que mariscaban de xeito ilegal. Os axentes levantáronlle aos identificados as correspondentes actas de infracción.

Ademais, nesta actuación os axentes comisaron 78 quilos de ameixa babosa e 7,5 quilos de ameixa fina. Os inspectores tamén incautaron 1 traxe de neopreno, 1 raño, 2 sachos e 3 redes.

A Consellería do Medio Rural e do Mar lembra á cidadanía que o consumo de marisco extraído e comercializado de xeito ilegal pode supor un risco para a saúde ao non ter pasado ningún tipo de control que o avale. Por iso pide ao consumidor que non compre produto fóra das vías legais de comercialización.