Os extraballadores da Fábrica de Armas piden a implicación de Negreira para que se revise a concesión

O expresidente do antigo comité de empresa da Fábrica de Armas da Coruña, Roberto Teijido, pediu ao alcalde herculino, Carlos Negreira, a súa “implicación” para que se revise a adxudicación da xestión a Hércules de Armamento.

Os extraballadores trasladaron as súas reivindicacións á praza de María Pita cunha concentración na que portaban carteis nos que podía lerse “Alcalde, Solución, Implicación”.

En declaracións aos xornalistas, Teijido trasladou a súa preocupación polo “silencio” da Axencia Tributaria en relación aos seus escritos sobre un posible delito de falsidade por parte de Hércules de Armamento por, supostamente, incumprir “obrigas a nivel tributario”.

“Como é posible que unha empresa que non cumpre coas súas obrigas poida optar a un concurso público”, preguntouse o dirixente de UGT e expresidente do antigo comité de empresa.

FACENDA E DEFENSA

En relación ao escrito que presentaron no rexistro municipal, dixo que a súa intención é esixirlle o alcalde que “se fagan actuacións ante Facenda e Defensa para evitar a consumación dun posible delito de falsidade documental e de fraude fiscal por parte de Hércules de Armamento”.

Mentres, en resposta ás manifestacións do rexedor sobre a fábrica de armas, Teijido insistiu en que os extraballadores están “coa legalidade” e que, por iso, lles preocupa “que a adxudicación sexa ilegal”. “As autoridades teñen que velar por que a legalidade se cumpra”, dixo tamén.

RESPOSTA DO GOBERNO LOCAL

Pola súa parte, o voceiro municipal, Julio Flores, defendeu que o Concello da Coruña demostrou a súa “firmeza e vontade” cos traballadores da Fábrica de Armas.

“O único que quere este goberno municipal é que se garanta ao cen por cen a actividade industrial”, afirmou Flores, que entende as demandas dos traballadores porque traballaron “a brazo partido” na defensa dun futuro para a factoría coruñesa.