Os emprendedores de Carballo infórmase sobre as axudas e servizos para desenvolver novos proxectos empresariais

Técnicos do Igape participarán o próximo mércores, día 19 de novembro, na xornada de motivación para emprender que se desenvolverá na sede do Fórum Carballo, co obxectivo de informar polo miúdo sobre o amplo abano de servizos e axudas que ofrece a Consellería de Economía e Industria para facilitar a posta en marcha e o desenvolvemento de novos proxectos empresariais.

No marco da xornada técnica organizada pola Deputación da Coruña en colaboración co Concello de Carballo, responsables do Igape informarán, a partir das 12 horas, sobre as posibilidades que achega a Lei do Emprendemento para facilitar a creación e o desenvolvemento de novas empresas, así como sobre os diferentes servizos de asesoramento e as axudas existentes para promover a actividade empresarial.

Entre as liñas de apoio promovidas pola Consellería de Economía e Industria cómpre salientar as integradas no programa Galicia 1000, que inclúe os préstamos directos Jeremie e os microcréditos ou préstamos con xuros bonificados para financiar os investimentos de emprendedores, autónomos ou pemes. Outro dos instrumentos dispoñibles é o fondo de capital risco Galicia Emprende, preparado para apoiar as novas iniciativas empresariais.

Durante esta xornada de motivación, que comezará ás 10 horas, haberá ademais relatorios sobre os conceptos e recursos básicos para emprender, sobre a importancia do deseño e a marca no ámbito empresarial ou sobre a Rede Eusumo, centrada no cooperativismo e a economía social.