O número de pasaxeiros do aeroporto de Santiago incrementouse nun 11,1% en outubro

A cifra de pasaxeiros rexistrada polo Aeroporto de Santiago durante o pasado mes de outubro medrou un 11,1 por cento con respecto ao mesmo mes do ano anterior, ata as 189.000 persoas.

Segundo os datos feitos públicos este xoves por Aena, os tres aeródromos galegos medraron en número de pasaxeiros durante o décimo mes do ano. En concreto, A Coruña rexistrou 85.000 pasaxeiros, un 5,1 por cento máis; e Vigo alcanzou os 59.000 pasaxeiros, un 0,8 por cento máis.

Do total de usuarios do aeroporto de Lavacolla, a maior parte -147.187- realizaron traxectos nacionais -un 8,3 por cento máis- e 41.405 internacionais -un 21,4 por cento máis-.

No caso da Coruña, os pasaxeiros de traxectos nacionais medraron un 3,1 por cento e os internacionais un 19,4 por cento. En Peinador, os usuarios de voos dentro de España medraron un 4,1 por cento, mentres que os internacionais diminuíron un 31,9 por cento.

En canto ao número de operacións, Lavacolla rexistrou en outubro 1.692 voos, un 14,9 por cento máis e Alvedro 1.272, un 5,2 por cento máis. Peinador rexistrou neste período 802 voos.