O grupo socialista critica que a marcha de Ángel Currás chega tarde

O voceiro socialista en Santiago, Francisco Reyes, criticou que a saída do exalcalde popular Ángel Currás do Concello da capital galega “chega tarde”, tras presentar este luns a renuncia á súa acta como concelleiro.

En rolda de prensa tras coñecerse a decisión, Reyes avisou de que a etapa “se vai pechar coas eleccións de 2015”, que será cando os cidadáns diten “sentenza” acerca do que o PSOE entende como un “auténtico despropósito” por parte do Partido Popular.

Así mesmo, advertiu ao actual rexedor, Agustín Hernández, o terceiro neste mandado, “vai ter que explicar por que o mantivo” no posto cunhas competencias o contido das cales, segundo denunciou, eran “un absoluto misterio”.

Para Francisco Reyes, a “incapacidade longamente mostrada” por Ángel Currás na súa época na Casa do concello compostelano xustifica a súa saída, que “chega tarde”, e “foi de feito asumida” polo PP cando “forzou a súa dimisión” como primeiro edil.

Agora, co novo nomeamento para substituilo, o socialista censurou que se vaia producir “un novo record”, polo número de concelleiros que non teñen o voto directo dos veciños. “É un auténtico escándalo”, subliñou, en alusión ao feito de que “a xente que vai rematar a lexislatura non ten nada que ver” coa que a comezou.

Acerca de se é menos mala esta circunstancia -a chegada dun novo edil non electo- ou que Currás quedase, aseverou que esa é, na súa opinión, “a definición dun dilema”. “Calquera das dúas opcións é mala”, incidiu, antes de insistir en que se se chegou “a este punto” é “polo desastre” ocasionado polos populares, e como “resultado de tres anos de despropósito”.

Neste sentido, finalizou insistindo en que queda pendente ofrecer explicacións por parte dos “que estiveron a punto de avalar” o nomeamento de Ángel Currás como delegado da empresa pública Tragsa en Galicia.

RAMA, O ÚNICO IMPUTADO

Por último, Reyes, cuestionada sobre se o seu grupo queda neste momento en peor situación por ser o único cun imputado -Bernardino Rama, na Operación Pokémon-, negouno, e destacou que o PSOE confía no arquivo das dilixencias, como sucedeu noutros casos.

Ao respecto, recordou que os socialistas pediron a dimisión de Currás pola súa “incapacidade”, pero non pola súa imputación, que interpreta que “pode acontecer como resultado da actividade de goberno”.