O Foro Social de Cangas denuncia obras ilegais no areal da antiga factoría de Massó

O Foro Social de Cangas (Pontevedra) formalizou este venres ante o Xulgado de Instrución da localidade en funcións de garda unha denuncia contra a Autoridade Portuaria de Vigo (APV) e os responsables urbanísticos do Concello de Cangas por supostos delitos de usurpación mediante alteración de lindes no areal da antiga factoría de Massó.

Así mesmo, tal e como consta no escrito, tamén denuncian que se cometeron na coñecida como praia da Cheminea presuntos delitos contra a ordenación do territorio, contra os recursos naturais e o medio ambiente, contra a Administración Pública e de falsidade de documento público.

Segundo o colectivo, a Autoridade Portuaria “alterou a liña da beira do mar realizando un recheo” nesta praia e, a pesar de ser “conscientes da inexistencia dun plan especial de ordenación da zona de servizo do porto nin de ningún outro plan”, os responsables urbanísticos do concello “informaron favorablemente” desta obra e “obviaron tamén as peticións de apertura dun expediente de reposición”.

A finais de outubro, o Foro Social de Cangas presentara unha solicitude no concello para que incoe o expediente de reposición da legalidade urbanística neste areal polas supostas ilegalidades que se levaron a cabo “no transcurso das obras de acondicionamento do litoral”.

En concreto, o colectivo mantén que, tras 9 anos de conflito e de denuncias contra a concesión do porto deportivo e do proxecto “especulativo” na antiga Massó, o Tribunal Supremo confirmou a ilegalidade dese proxecto.

Con todo, tras licitar un proxecto de acondicionamento ambiental, iniciáronse os traballos polos que, dixo, está a construírse un muro que supón “un caso máis de recheo ilegal na beira do mar” e estanse realizando outras modificacións que “alteran” a liña da beira do mar no deslinde de Costas vixente.