O casco vello de Ourense volverá acoller os cantos de taberna de “Hai que cantar!”

Trala boa acollida do segundo encontro de cantos de taberna que tivo lugar na zona dos viños de Ourense o pasado 16 de maio, o grupo organizador (alumnos e alumnas do 2º curso do ciclo de Produción de Audiovisuais e Espectáculos do CIFP Farixa) pon en marcha a III Edición de “Hai que cantar!”.

O vindeiro venres 28 de novembro, o casco vello de Ourense será testemuña unha vez máis dunha actividade organizada por e para revitalizar a antiga tradición de “dar o cante nas tabernas” como décadas atrás o facían aqueles que nelas se reunían para desfrutar do bo viño da nosa terra entonando unhas cantigas cos seus.

Porén, arredor das oito da tarde, os grupos participantes arrancarán dende a Praza do Ferro un percorrido por varias tabernas da zona dos viños. Estas serán as mesmas que participaron na pasada edición: Bar Orellas (Rúa da Paz), Montecarlo, Sol, O Rural, O cogumelo e Bar París. Ademais, ó igual tamén que no anterior encontro, contaremos co patrocinio de Viña Reboreda.

A vindeira semana convocaremos ós medios a unha roda de prensa na que ampliaremos información sobre os grupos participantes e sobre o percorrido que se levará a cabo polas seis tabernas citadas, entre outros asuntos relativos ó evento.