O BNG denuncia no Congreso a carga policial no desafiuzamento dunha vivenda na Coruña

A deputada do BNG no Congreso Rosana Pérez rexistrou unha iniciativa na que pide ao Goberno central explicacións pola “brutal carga policial” e o “desmesurado despregamento da Policía Nacional” para posibilitar o desaloxo dunha familia da súa casa no polígono de Elviña.

Así, a parlamentaria nacionalista lamentou que se “consumase outro desaloxo no medio dunha grande agresividade dos efectivos policiais” e criticou que se destine á policía a “consumar desafiuzamentos en lugar de a defender os cidadáns aos que se debe”.

“Lonxe de destinar a policía a unha función social, de protección aos máis débiles, restrínxese cada vez máis a unha pura función represora, mesmo en contra dos dereitos dos cidadáns aos que ten que amparar”, expón.

A deputada do Bloque reprocha ao Ministerio do Interior que acudisen ao lugar 16 furgóns da Policía Nacional, “un despregamento sen precedentes, desmesurado e esaxerado”.

Na súa iniciativa, dirixida ao Goberno, relatou os feitos acontecidos este xoves cando ás 11,00 horas deste xoves entraba na casa a comisión xudicial. “Axentes da policía asañáronse con moita violencia contra manifestantes e activistas presentes no desafiuzamento. As imaxes que se poden ver son suficientemente ilustrativas da agresividade practicada para con persoas a única responsabilidade da cal é a de protagonizar un acto de solidariedade cunha familia que quedou sen a súa casa”, describe.

CONSCIENCIA

A deputada do BNG denunciou que a carga policial provocou mesmo que unha persoa perdese a consciencia e que outras fosen trasladadas nun furgón da policía.

A deputada nacionalista, así mesmo, criticou a “carta de presentación do novo delegado do Goberno en Galicia”, ao respecto do que dixo que, “segundo parece, continúa co labor represora do seu antecesor, o único mérito da cal foi limitar os dereitos de reunión e manifestación dos cidadáns”.

A deputada do BNG dirixe ao Goberno unha batería de preguntas por estes feitos. Así, quere saber qué criterios se seguiron para ordenar o despregamento policial, por que se practicaron cargas contra os manifestantes que se “solidarizaron de forma pacífica coa familia para defender os seus dereitos sociais básicos” e pide que se investiguen os feitos.