O alcalde de Lugo dá a benvida a Feijóo á súa teoría sobre imputacións

O alcalde de Lugo, o socialista José López Orozco, deu este venres a “benvida” ao presidente da Xunta de Galicia, Alberto Núñez Feijóo, á “teoría Orozco” sobre as imputacións, despois de que esta semana pedise cautela nos procesos xudiciais tras o sobresemento provisional da imputación do alcalde de Ferrol, José Manuel Rey Varela, na ‘Operación Pokémon’.

“Benvido señor presidente, espero que teña a lección aprendida para sempre, e que non se esqueza de cando co dedo sinalaba a outros, agora parece que entrou en razón”, sinalou Orozco durante unha rolda de prensa para presentar os acordos alcanzados entre o Concello e a Consellería de Cultura.

O rexedor socialista acolleu a Feijóo na que denominou “teoría Orozco” aquela que, segundo aclarou, “está na Constitución e nos dereitos humanos”. “Que colla o artigo 23.4 da Constitución no que di que todos somos inocentes ata que se demostre o contrario”, apostilou.

Con respecto á situación do alcalde de Ferrol, de quen se demostrou que non era ‘Josman’ nas escoitas da ‘Pokémon’, Orozco afirmou alegrarse. “Onte púxenme en contacto en canto puiden con el para felicitalo e darlle ánimo polo mal que o pasou estes meses”, abundou.

Sobre a súa imputación na instrución que leva a xuíza Pilar de Lara Cifuentes, o alcalde de Lugo insistiu na súa inocencia. “Chegado o momento tamén serei desimputado”, concluíu.