O alcalde de Becerreá pide desculpas por non lograr apoios necesarios para nomear a Teresa Romero filla adoptiva

O alcalde de Becerreá, Manuel Martínez, pediu este venres “desculpas” á auxiliar lucense que superou o ébola, Teresa Romero, por non poder solicitar os apoios necesarios para nomeala filla adoptiva da localidade e dar por aprobado o acordo, votado este xoves, cando se necesitaba unha maioría absoluta de apoios.

No pleno deste xoves, a corporación local debateu a proposta para declarar a Teresa Romero filla adoptiva, unha iniciativa que foi apoiada por cinco concelleiros socialistas, mentres que populares e nacionalistas -que suman seis edís- abstivéronse.

Nun principio, a corporación deu por aprobado este acordo, dado que a lei esixe unha maioría simple. Con todo, a ordenanza de honras do propio municipio, do ano 2003, esixe que este tipo de acordos se adopten por maioría absoluta ou por dous terzos da corporación, polo que sería necesario un voto adicional para dalo por válido.

A xuízo do rexedor, non concederlle este título, en base “á coraxe, a enteireza, a valentía e a dignidade de Teresa Romero”, é “unha falta de respecto total e absoluta”, sobre todo tendo en conta que se coñeceu que a auxiliar doará a súa plasma a un enfermo en Italia.

“Está disposta a colaborar non só cos médicos deste país, senón de toda Europa ou daqueles que llo soliciten. Esta solidariedade merecía que o pobo de Becerreá estivese á altura das circunstancias e non foi así porqué o BNG e o PP, con estraños intereses electorais, opuxéronse”, lamentou o alcalde, á vez que criticou que a oposición empregue este feito como “arma arreboladiza”.

No entanto, Martínez deixou a porta aberta a buscar unha “mellor ocasión” para alcanzar este acordo, nun momento no que “impere o sentido común”.