O acusado de arrancar a outro xoven parte da orella nunha pelexa en Vigo alega defensa propia

O mozo Diego D.P., acusado dun suposto delito de lesións por arrancar dunha dentada parte da orella esquerda doutro rapaz no transcurso dunha pelexa, alegou este martes que actuou en defensa propia, no xuízo que se celebrou na sección quinta da Audiencia Provincial de Pontevedra.

Segundo a Fiscal, na madrugada do 21 de xullo de 2013, no recinto das festas da parroquia viguesa de Cabral, o acusado -que xa foi condenado anteriormente por un delito de lesións- abalanzouse sobre a vítima, Ramón S.L., por razóns que se descoñecen, e lle mordeu nunha orella, arrancándolle parte desta. Por estes feitos acúsao dun delito de lesións e pide para el 4 anos e 11 meses de prisión, ademais dunha indemnización para a vítima.

No xuízo, o acusado declarou que foi Ramón quen o atacou e o agarrou polos xenitais, polo que, para defenderse e liberarse, tivo que mordelo. Así mesmo, denunciou a existencia dunha animadversión deste mozo cara a el, e relatou un episodio en que Ramón supostamente dirixiuse a el de forma amenazante -mentres un ía en coche e o outro en moto-.

Pola súa banda, o mozo atacado nesa madrugada de xullo de 2013 afirmou ante o tribunal que foi o acusado quen se lanzou sobre el, sen mediar discusión previa, e mordeulle a orella. Uns amigos do rapaz que o trasladaron ao hospital tras ese episodio e que declararon como testemuñas corroboraron a versión da vítima.

A avogada do acusado alegou defensa propia e mantivo que Diego D.P. actuou tras a provocación do outro rapaz, que se atopaba en estado de embriaguez e que xa tiña unha actitude de resentimento cara a el.