Narart expón ata finais de mes na galería da Casa do Concello

Son máis dunha vintena de cadros de oito artistas da comarca, todos eles agrupados na asociación Narart que busca impulsar a creatividade en todos os ámbitos da plástica. Paisaxes, imaxes oníricas, mariñas, bodegóns… compoñen unha mostra representativa tanto dos pintores e pintoras que expoñen como do obxectivo último da entidade con sede en Narón.

Narón Amigos da Arte (Narart) agrupa artistas de toda a zona e non se cingue exclusivamente ao mundo da pintura, senón que está aberta o outros ámbitos como a música, a fotografía ou a historia. A través de narart.blogspot.com pode seguirse puntualmente a súa actividade, que nos últimos meses estivo centrada en exposicións pictóricas e en charlas. Ademais, a asociación tamén ten un cometido solidario, xa que colabora con outras entidades organizando galas e poxas benéficas.

En San Sadurniño podemos gozar ata o 29 de novembro dunha exposición pictórica dalgúns dos creadores e creadoras integrados en Narart. Teresa Caaveiro, Juan Zaplana, Carlos Barcón, Alejos Lorenzo, Esther Piñán, María Julbe, Jesús Regueira e María Jesús Millarengo achégannos 25 cadros con técnicas e temas ben diferentes, aínda que entre eles predominan os óleos sobre táboa con as paisaxes rurais e costeiras. A mostra está aberta con entrada libre de luns a sábado polas mañás.