Miguel Pérez Parada proclámase gañador do terceiro concurso ‘Busca do patrimonio na Biblioteca’

Premiados no concurso da biblioteca

A Biblioteca Pública Municipal de Verín, coa colaboración do historiador e escritor Bruno Rúa, promoveu a terceira edición do concurso ‘Busca do patrimonio na Biblioteca’, co obxecto de divulgar o coñecemento da riqueza patrimonial da nosa comarca entre o público infantil e xuvenil, que foi vencido por Miguel Pérez Parada (11 anos).

Este mozo verinense, que xa se alzara coa vitoria na primeira edición deste concurso, resolveu todas as probas nun tempo de marca, tan só tres días. Como seguintes clasificados quedaron Noelia Gallego Campos, Nerea Pérez Domínguez e Lara Páez Rodríguez.

Oconcurso ‘Busca do patrimonio na Biblioteca’, estaba aberto a menores da comarca de Verín, do municipio de Chaves e socios/as da Biblioteca de Verín, con idades comprendidas entre os 11 e os 16 anos (cumpridos ou que cumpran dentro do ano 2014). No mesmo, cada participante tiña que fotografarse en tres lugares do patrimonio comarcal (dando así a coñecer a nosa riqueza patrimonial, histórica e cultural). Para descubrir cada un dos tres espazos, facilitábase unha pista (imaxe ou un texto íntegro dun libro da sección local da biblioteca), que conducía ao/á participante a un o varios libros en cuestión que lle indicaba o lugar exacto no que se atopa a peza ou lugar, e no que se tiña que fotografar ou recabar a información suficiente para realizar o que se lle solicitaba en cada caso.

Devandito concurso, que comezou o pasado 20 de setembro, permitiu ao gañador acadar unha Tablet Samsung Galaxy Tab de 7” (patrocinado por Ordenadores Verín e o Concello de Verín), ademais os primeiros clasificados tamén recibiron un pequeno agasallo informático, de parte da concelleira de Cultura, María Corona Meixeira Romasanta, que foi a encargada de anunciar o vencedor do concurso.