Máis de 200 persoas asisten ás xornadas sobre cualificacións profesionais no ámbito das emerxencias na AGASP

Xornadas na AGASP

Máis de 200 persoas asisten hoxe na Academia Galega de Seguridade Pública ás Xornadas técnico-informativas sobre as cualificacións profesionais no ámbito das emerxencias.

O principal obxectivo das Xornadas é que os asistentes poidan adquirir información sobre as vías de obtención dunha cualificación profesional, con especial atención ás referidas ao ámbito das emerxencias, polo que o contido das Xornadas versará principalmente no Sistema nacional de cualificacións e formación profesional; no Catalogo nacional de cualificacións profesionais; na seguridade e seguridade e medio ambiente, con especial referencia á cualificación profesional de extinción de incendios e salvamento; no procedemento de recoñecemento das competencias profesionais adquiridas a través da experiencia laboral ou de vías non formais de formación coma o Instituto Galego das Cualificacións.

Os destinatarios das Xornadas son profesionais dos servizos de extinción de incendios e salvamento (bombeiros municipais e de consorcios), persoal dos grupos de emerxencias supramunicipais (GES), profesionais dos servizos municipais de protección civil e emerxencias e persoal voluntario de agrupacións de voluntarios de protección civil. Esta actividade é cofinanciada nun 80 % polo Fondo Social Europeo dentro do programa operativo Fondo Social Europeo de Galicia 2007-2013.

Nesta liña, a Academia segue apostando pola profesionalización no ámbito das emerxencias, tal e como fixo ca cualificación de socorrismo acuático, que xa leva dous anos ca acreditación de competencias e acreditación profesional para estes profesionais. Así, otorga a posibilidade de obter unha cualificación concreta ás persoas que traballan día a día nas emerxencias co recoñecemento da súa traxectoria laboral.