Máis de 2.000 menores de infantil, primaria e secundaria abordan a igualdade a través de actividades lúdicas e formativas

A concelleira de Igualdade e Xuventude do Concello de Ferrol, visitou esta mañá no Centro de Educación Infantil e Primaria (CEIP) Almirante Juan de Lángara y Huarte o obradoiro “Cambiando de conto”, un dos tres programas da área de Igualdade que se desenvolven en diferentes centros de ensino. Máis de 2.000 nenos e nenas, pertencentes a dez centros escolares da cidade, participan nestas actividades lúdicas que pretenden educar na igualdade e a ruptura de estereotipos.

Casal Míguez explicou que cada un dos programas está enfocado a unha idade concreta e que a temática se aborda de diferente maneira. Neste senso, sinalou que o alumnado de infantil realiza a actividade “Os=As” a través de monicreques, mentres que os menores de secundaria desenvolven a iniciativa “E ti, de que vas?” mediante as redes sociais. En canto ao programa “Cambiando de conto”, a edil de Igualdade destacou que os estudantes de Educación Primaria tratan a ruptura de estereotipos a través de contos infantís como “Cincenta”.