Funergal destaca o potencial internacional das empresas galegas de servizos funerarios

O director do Igape, Javier Aguilera, e o delegado territorial da Xunta en Ourense, Rogelio Martínez, inauguraron este mediodía en Expourense a VIII edición da Feira Internacional de Produtos e Servizos Funerarios (Funergal), que conta coa participación de 90 expositores de nove países.

O delegado territorial da Xunta destacou que das máis de 1.600 empresas funerarias que existen en España, 600 emprázanse en Galicia e dan emprego a preto de 2.500 profesionais, que na súa maioría son autónomos ou microempresas familiares.

Pola súa parte, o director do Igape salientou o potencial internacional das empresas galegas de servizos funerarios, que acaparan no que vai de ano o 87% das exportacións españolas de ataúdes de madeira. Aguilera Navarro destacou a importancia da mellora da competitividade empresarial como unha das claves para que as empresas, sexa cal sexa a súa actividade, poidan vender os seus produtos ou servizos en mercados internacionais.

Neste sentido, lembrou que, a través do Igape, a Consellería de Economía e Industria achega servizos avanzados como os do programa Reacciona, así como programas para a formación de directivos e xestores de empresas e liñas de axuda para facilitar os investimentos e a renovación tecnolóxica das compañías.

Pola súa banda, o delegado da Xunta de Galicia, Rogelio Martínez, animou a Expourense a seguir apostando pola estratexia de apoio ás empresas nas súas saídas ao mercado exterior e de posicionamento de Galicia como comunidade líder en sectores produtivos punteiros.

Na VIII edición da Feira Internacional de Produtos e Servizos Funerarios participan empresas de mercados como China, Colombia, Estados Unidos, Portugal, México, Italia, Polonia ou India, así como importadores doutros mercados exteriores. No certame deste ano os profesionais do sector terán a oportunidade de actualizar coñecementos a través dun completo programa de actividades e xornadas técnicas.