Ferrol acollerá a cerimonia de entrega do “Premio Joven Empresario de Galicia”

Presentación do acto

O alcalde de Ferrol, Jose Manuel Rey Varela, presentou esta mañá a cuarta edición do “Premio Joven Empresario de Galicia”, cuxa gala terá lugar o vindeiro día 11 de decembro no Teatro Jofre, a partir das 19.00 horas Neste acto de presentación, o primeiro edil da cidade estivo acompañado pola presidenta de AJE Galicia, Carmen José López Rodríguez; e o presidente de AJE Ferrolterra, Cristóbal Dobarro Gómez.

O galardón pretende recoñecer o labor dos xoves empresarios galegos que co seu esforzo e dedicación contribúen a incrementar a economía de Galicia. Os recoñecementos deste certame establecen diferentes categorías: Premio Joven Empresario de Galicia, Mención de Honra á Internacionalización, Mención de Honra á Innovación e Mención de Honra á Creación de Emprego Estable.

Jose Manuel Rey Varela destacou o feito de que sexa Ferrol a cidade escollida para celebrar estes premios por primeira vez fora da súa sede habitual, que é Santiago de Compostela; o que “converterá a nosa cidade por unhas horas na capital do emprendemento en Galicia”. “Comparto os obxectivo que persegue a Asociación de Jóvenes Empresarios con este certame, a través do cal se recoñece o tesón, esforzo e afán de superación dos emprendedores”, dixo Jose Manuel Rey.