Feijóo afirma que a dimisión de Currás é unha boa decisión

O presidente da Xunta de Galicia e do PPdeG, Alberto Núñez Feijóo, afirmou este luns que a dimisión de Ángel Currás como concelleiro de Santiago “é unha boa decisión” e felicitouno porque cre que acertou con esta alternativa.

En declaracións á prensa antes de ofrecer unha conferencia no Círculo de Economía engadiu que Currás volverá á súa actividade docente, tras clarificarse a súa imputación no que acusou de “asunto sen transcendencia”.

Precisamente, Currás, que está imputado na Operación Pokémon, vincula que agora dera o paso de renunciar como concelleiro en Santiago de Compostela ao sobresemento, a semana pasada, da súa imputación por prevaricación e acoso moral sobre o exsubxefe da Policía Local de Santiago José Antonio Carril.

En declaracións, Currás, que se reincorporará á súa cátedra de Bioloxía no Instituto Arcebispo Xelmírez I da capital galega, asegurou que adopta esta decisión libremente e “sen presión” do seu partido.

A renuncia prodúcese despois que o pasado mes de xuño fose forzado a dimitir como alcalde tras a profunda crise que provocou no goberno compostelano do PP a inhabilitación de sete concelleiros, que se sumou á dimisión doutros dous edís imputados.

Ángel Currás levaba sete anos no Concello de Santiago, cinco como concelleiro e dous como alcalde, onde relevou a Gerardo Conde Roa, que foi forzado a dimitir a raíz da súa imputación por unha fraude fiscal pola cal acabou por ser condenado.