En liberdade con cargos o terceiro detido polas protestas contra Feijóo na Facultade de Matemáticas

Un novo quedou en liberdade con cargos tras ser detido este venres en Santiago de Compostela en relación coas protestas rexistradas contra o presidente da Xunta, Alberto Núñez Feijóo, na Facultade de Matemáticas o pasado 23 de outubro.

Segundo confirmaron fontes da Policía Nacional, a detención produciuse ao longo da mañá deste venres na capital galega e, tras comparecer nos xulgados, o mozo quedou en liberdade con cargos.

Esta feito prodúcese despois de que axentes da Policía Nacional detivesen no mediodía do pasado mércores 5 a dous mozos que foran identificados durante as protestas.

En concreto, o pasado 23 de outubro un grupo de novos impediu coas súas protestas que o xefe do Executivo autonómico puidese inaugurar a Conferencia de Decanos de Matemáticas. Cando se dirixía a abandonar o recinto, unha parte dos manifestantes e o persoal de Feijóo protagonizaron un forcexo.