Dorribo declara ante a xuíza polo quebrantamento de medidas cautelares

Jorge Dorribo

O empresario Jorge Dorribo acudiu este luns aos xulgados de Lugo para declarar ante a titular do Xulgado de Instrución Número 3 de Lugo, Ronsel San José, polo quebrantamento das medidas cautelares impostas -non acudir regularmente ao xulgado como tiña fixado- tras a súa detención e posta en liberdade no marco da instrución ‘Operación Campión’.

Sobre as 10,50 horas deste luns, Dorribo estaba á espera de comparecer ante a xuíza, que previamente confirmara ás portas da sede xudicial que o esperaba a declarar por quebrantamento das medidas impostas de acudir regularmente ao xulgado.

Preguntado sobre se o chamara a xuíza para declarar, o principal imputado no ‘Campión’ respondeu: “Veño por min”. Posteriormente, afirmou que se atopa tranquilo tras pedir a Fiscalía máis de 23 anos de prisión por varios delitos no marco da causa instruída por Ronsel San José.

De feito, a semana pasada o Colexio de Avogados de Lugo designou, a petición da xuíza Ronsel San José, senllos letrados da quenda de oficio para defender ao empresario Jorge Dorribo no proceso da ‘Operación Campión’ e noutra causa por estafa que leva outro xulgado lucense.

Un deles será o que defenda a Dorribo na causa por suposta estafa que leva o Xulgado de Instrución Número 2 de Lugo, mentres que a outra letrada escollida será a encargada da súa defensa na causa ‘Campión’.

PETICIÓN DE FISCALÍA

En concreto, no marco do ‘Campión’, a Fiscalía solicita penas que suman máis de 23 anos de prisión para o considerado o principal acusado por diversos delitos entre os que se inclúe tráfico de influencias, branqueo de capitais e contra a facenda pública, así como por falsificación de documentos.

Por un delito contra a facenda pública en grao de tentativa considera o fiscal que procede impor a Dorribo unha pena de oito meses de prisión; por outro contra a facenda pública tres anos e seis meses; por outro continuado de falsidade en documento mercantil dous anos de prisión; por falsificación de certificado unha multa de cinco meses con cota diaria de 20 euros; por delito continuado de suborno solicita unha pena máxima de catro anos e nove meses de cárcere; e por branqueo de capitais, dous anos e seis meses.

A iso súmase por delito contable continuado sete meses de prisión; por insolvencias punibles, catro anos de prisión; por dous delitos contra a facenda pública, tres anos de prisión por un en 2010, e outros tres anos por outro en 2011.