Alfonso Rueda replica que a sede do Partido Popular de Pontevedra está alugada

O vicepresidente da Xunta e secretario xeral do PPdeG, Alfonso Rueda, aseverou este mércores no Parlamento galego que a sede do seu partido en Pontevedra “está alugada” ante as reiteradas preguntas da deputada socialista Marisol Soneira, quen tamén sementou dúbidas sobre o financiamento do “principal partido” de Galicia.

En concreto, Soneira indicou que “tódolos casos de corrupción” teñen o PP como un dos seus “eixes” e que “sempre” os casos gardan relación “co financiamento irregular” do partido. “E vostedes non axudan, porque non comparecen”, engadiu, antes de apuntar que “o PP de Galicia” tamén forma parte os distintos casos estatais de “mordidas” para o PP.

Ao fío diso, referiuse á trama ‘Gürtel’ para recordar que un informe da Unidade de Delincuencia Económica e Fiscal (UDEF) da Policía certifica que Génova se fixo cargo dunha débeda de 187.000 euros do PP de Pontevedra polo seu local a cambio, supostamente, da devolución deses fondos en negro.

Sen achegar máis detalles, o vicepresidente da Xunta negou este extremo alegando que esa sede “está alugada”. No que si fixo fincapé é na “falta de seriedade e rigor” dos socialistas, ao tempo que cuestionou a súa intención de “utilizar o Parlamento para facer de xuíces” co PP no banco dos “acusados”.

Así mesmo, replicou que o PP non está implicado no caso dos ERE de Andalucía para rebater a acusación de que o seu partido está en todos os sumarios e recordou o caso Filesa para contraatacar co “financiamento do PSOE”. Dito isto, rexeitou seguir co “e ti máis” e preferiu “falar con seriedade” da corrupción e non a “usar para desgastar”.

OPERACIÓN ZETA

Na súa quenda de resposta, Marisol Soneira falou sobre a Operación Zeta para dar conta de que “un conseguidor” a soldo da trama é “amigo do presidente” da Xunta, Alberto Núñez Feijóo, e “pasa a noite en Monte Pío”.

Máis alá desta referencia ao empresario Pachi Lucas, a deputada do PSdeG preguntou por que o exdirector xeral de Traballo Odilo Martiñá non cesou ata setembro de 2014 se a Xunta -tal e como aseguraron varios dos seus dirixentes- levaba investigando o suposto fraude nos cursos de formación dende 2012.

“Por moito que lles amole, vimos irregularidades e levámolas á Fiscalía”, respondeu Rueda, e non pasou por alto que moitas das empresas implicadas “contrataron o triplo” co bipartito que dende a chegada de Feijóo a San Caetano.

Ao respecto, a parlamentaria socialista preguntou por que “non se fixo o mesmo” neste caso que coa xa desmentida “trama agraria”. “¡Vostedes denunciaron aos que investigaban, precisamente por investigar!”, exclamou Roda, crítico con que agora se lle reproche “non investigar suficiente e a tempo”.

“NON É INEVITABLE”

Á marxe dos casos concretos, o vicepresidente galego sinalou que “a corrupción non ten patria nin matrículas”, pois atinxe a “todos os partidos, a sindicatos, organizacións empresariais, cargos públicos, cidadáns particulares”.

Non obstante, conveu coa socialista en que a corrupción política “produce malestar, desconfianza e desafección” e que, por iso, é necesario “combatela” porque “non é inevitable”. “Pedimos a súa colaboración, pero nunca a temos”, lamentou, antes de resaltar que a Xunta xa está a “tomar medidas”.