A primeira fase da renovación da rúa Federico Tapia comeza o 25 de novembro

O Concello informa de que o inicio da primeira fase da reurbanización da rúa Federico Tapia, que estaba programada para esta semana, finalmente empezarase a executar o vindeiro martes, 25 de novembro, unha vez se concluíu a reparación da tubaxe da rolda de Outeiro e se certifique que a circulación volve á normalidade nas inmediacións da estación de trens.

Para a renovación de Federico Tapia, o Goberno municipal porá en marcha un plan de tráfico para facilitar a circulación na zona e mellorar a eficiencia de 10 das 23 liñas do transporte público. A primeira fase do proxecto adxudicouse a Arias Hermanos Construcciones por 876.621 euros, o que supón unha rebaixa do 18,8% (en 203.257 euros) con respecto ao orzamento de licitación.

Nesta primeira fase desta actuación en Federico Tapia, que alcanza os 5.150 metros cadrados, acometerase por tramos: entre a praza Antonio Tenreiro e a praza de Vigo, por unha banda, e entre as prazas de Vigo e de Galicia, polo outro. O obxectivo é empezar as obras no tramo entre a praza Antonio Tenreiro e a praza de Vigo e, a continuación, ao concluír estes traballos, comezarase o seguinte tramo, até a praza de Galicia.

Os traballos teñen un prazo de execución de 6 meses -dous menos dos fixados no expediente de licitación-, aínda que durante a campaña do Nadal pararanse as obras dentro do espírito do actual equipo de goberno de compaxinar os traballos coa actividade diaria dos cidadáns e dos comerciantes nunha época estratéxica para o sector.

Esta nova actuación pretende favorecer a mobilidade na zona, así como renovar o pavimento, mellorar a rede de sumidoiros e os puntos de iluminación pública co obxectivo final de revitalizar unha das vías principais do centro urbano e que une os barrios de Catro Camiños, A Falperra e o Ensanche co centro da cidade.

SEGUNDA FASE

Este proxecto de urbanización de Federico Tapia conta cunha segunda fase para a que se convocou un concurso de ideas que inclúe a reurbanización da praza Antonio Tenreiro -uno dos fundadores do Colexio Oficial de Arquitectos de Galicia-, unha superficie aproximada de 3.340 metros cadrados. Para executar esta segunda etapa do proxecto, o orzamento roldará os 700.000 euros. Infraestruturas quere recuperar esta praza e conceder o máximo protagonismo ao peón, mellorando a súa mobilidade.

Como xa ocorreu noutros proxectos, como a reordenación do paseo marítimo coruñés, o Concello quere contar coa colaboración dos colexios profesionais para este concurso de ideas que, ademais, foi todo un éxito de participación. Presentáronse un total de 65 propostas, o que garantiu obter o maior número de ideas posibles e, ao mesmo tempo, ofrecer á canteira de técnicos de arquitectura, enxeñaría e urbanismo unha oportunidade de expresar e reflectir a súa creatividade.

DISPOSITIVO ESPECIAL DE MOBILIDADE

A Concellaría de Tráfico deseñou, de maneira coordinada coa área de Infraestruturas, un plan de tráfico para a execución deste proxecto e minimizar ao máximo posible as afeccións que se poidan producir na circulación, ofrecendo alternativas á mobilidade nesta zona da Coruña e que á vez suporán cambios e melloras en 10 das 23 liñas da rede de transporte público urbano.

O plan de tráfico deseñado para a contorna de Federico Tapia comezará a funcionar o vindeiro martes, 25 de novembro. Porase en marcha o desvío provisional do tráfico nunha zona cunha importante densidade de circulación e que, por tanto, require de medidas especiais.

Posto que as obras desta primeira fase comprenden o tramo de Federico Tapia desde Ramón da Sagra até Marcial do Adalid, o acceso ao seguinte tramo de Federico Tapia realizarase entrando no Ensanche pola praza de Antonio Tenreiro, Emilia Pardo Bazán e Marcial do Adalid, onde se recupera o percorrido por Federico Tapia.

Co obxectivo de facilitar o máximo posible os desprazamentos dos condutores, ademais da pertinente sinalización de obra nas inmediacións de Federico Tapia con todos os desvíos provisionais, aos condutores tamén se lles informará a través dos paneis de información variable de Alfonso Molina para que, no caso de que exista unha elevada densidade de tráfico pola zona de Federico Tapia, poidan optar por outras rutas alternativas, como a rolda de Nelle ou a rolda de Outeiro -rutas adecuadas sobre todo para os condutores que se despracen á zona do Palacio da Ópera, glorieta de América, zona do Ensanche, Riazor e mesmo Monte Alto; do mesmo xeito que co plan de tráfico da Mariña-. Igualmente, faranse as modificacións necesarias na regulación semafórica nos cruces con Marcial do Adalid para adaptalas ás novas circunstancias do tráfico rodado e peonil.

TRANSPORTE PÚBLICO

O plan de tráfico de Federico Tapia tamén inclúe cambios en 10 das 23 liñas da rede de transporte público, ademais doutras medidas complementarias que contribuirán a ofrecer un servizo de bus urbano de calidade. A Concellaría de Mobilidade aproveitou estas obras de reurbanización de Federico Tapia para abordar melloras na eficiencia das liñas. Trátase de modificacións expostas de maneira global que van máis aló da execución desta obra en Federico Tapia e que, ao facerse todas á vez, resultan máis fáciles desde o punto de vista operativo e máis eficaces para o usuario, pois lle permiten adaptarse e comprender mellor a información. Con estas modificacións o Concello coruñés busca:

– Mellorar a eficiencia das liñas, utilizando preferentemente o viario principal, xerarquizado conforme ao Plan de Mobilidade Urbana Sustentable (PMUS).

– Mellorar a conexión cos centros sanitarios e hospitalarios.

– Incorporar medidas complementarias, como un plan de información, a mellora da atención do usuario en base a procedementos de calidade, ou un plan de sondaxe de opinión para avaliar os cambios efectuados nas liñas.

Todos os cambios supoñen unha importante reordenación de 10 das 23 liñas da rede de transporte público e algunhas consolidaranse como definitivas tras coñecer a opinión dos usuarios e avaliar o seu funcionamento. Así, o compromiso da Compañía de Tranvías cos seus clientes e co Concello implica a avaliación e validación de todos estes cambios que agora se implementan a través dun plan de información e atención ao usuario que sirva para coñecer as vantaxes das melloras realizadas, así como un plan de sondaxe de opinión respecto dos cambios para poder tomar unha decisión definitiva.

Liñas 24 e EU (Especial Universidade)

Estes buses urbanos circularán desde a parada da estación de autobuses por Alfonso Molina cara á praza de Ourense, Juana de Veiga e praza de Pontevedra. Desta maneira, as paradas provisionais serán as seguintes: Alfonso Molina-intersección con Fernández Latorre; praza de Ourense; e praza de Pontevedra-oficinas do Deportivo.

Esta modificación do percorrido aconsella tamén a substitución da parada que actualmente realizan as liñas universitarias á altura do número 10 de Juan Flórez pola existente na praza de Pontevedra xunto ás oficinas do Deportivo. Esta decisión adoptouse porque se evitan as dificultades de manobra dos autobuses para acceder á parada do inicio de Juan Flórez, coa realización nun espazo reducido dun xiro de practicamente 180 graos (de Francisco Mariño a Juan Flórez); porque se aproxima esta parada á existente en praza de Pontevedra-Feminino, o que favorece os transbordos; porque se aumenta a potencialidade das liñas ao conectalas con dous puntos estratéxicos do transporte como son as prazas de Pontevedra e Ourense; e porque se manteñen as frecuencias e tempos de viaxe ao desvialas no seu itinerario da zona de afección de obras.

Liñas 3 e 3-A

A parada que na actualidade realizan as liñas 3 e 3-A en a praza de Pontevedra xunto á sede do Deportivo pasará a efectuarse no número 10 de Juan Flórez, o que posibilita que a liña 3-A poida circular no tramo de Juana de Veiga polo túnel da praza de Pontevedra, mellorando así a súa frecuencia.

Liñas 21 e 22

En dirección entrada á cidade, estas dúas liñas farán o seu percorrido habitual até chegar a Catro Camiños, onde, en lugar de seguir por Castiñeiras e Federico Tapia, circularán por Costa da Palloza, Primo de Rivera, Linares Rivas, praza de Ourense, Juana de Veiga e praza de Pontevedra, onde recuperarán o seu itinerario.

Deste xeito, as paradas provisionais serán as seguintes: Costa da Palloza, á altura do número 5; Primo de Rivera-Palloza; Primo de Rivera-Viaduto; praza de Ourense; e praza de Pontevedra.

Liña 23

O Concello aproveita esta reordenación para atender a demanda dos veciños de O Birloque, Elviña e Pablo Picasso, pois esta liña prestará servizo ao hospital Abente e Lago. Así, esta liña en sentido entrada á cidade, e a partir de Ramón e Cajal-El Corte Inglés, continuará o seu percorrido por Ramón e Cajal, avenida do Exército, Primo de Rivera, Linares Rivas, praza de Ourense, Obelisco, Porta Real e hospital Abente e Lago, realizando as paradas xa existentes ao longo do seu percorrido.

Esta importante reordenación significa a mellora de conexión co centro da cidade, con dous centros sanitarios importantes (Casa do Mar con Abente e Lago) e a mellora de frecuencia da liña e do servizo de bus urbano dos veciños de Feáns, O Birloque e Elviña ao unificarse coa liña 23-A.

As novas paradas en sentido entrada á cidade e a partir de Ramón e Cajal-El Corte Inglés son as seguintes: avenida do Exército-Porto; Primo de Rivera-A Palloza; Primo de Rivera-Viaduto; praza de Ourense; praza de Mina; Obelisco; Autoridade Portuaria; Costa de
O Parrote; Abente e Lago.

Liña 11

Nesta primeira fase da obra de Federico Tapia, a liña 11 non se verá especialmente afectada, pero si o fará en fases posteriores. Trátase dunha liña de longo percorrido (Monte Alto-A Grela), con quiebros pouco racionais e que circula por cruces que, debido á súa intensidade de tráfico, retardan os tempos do servizo.

A técnicos da área de Mobilidade e da Compañía de Tranvías analizaron as melloras que permitan optimizar e simplificar o percorrido desta liña. A modificación exposta acurta o seu percorrido para realizar un itinerario máis directo e racional: en lugar de subir pola rúa Hospital cara á rúa San Juan, continuará polo paseo marítimo cara ás Lagoas, incorporándose unha nova parada á altura do colexio Salesianos e continuando desde o Hotel Meliá María Pita co seu itinerario habitual. Será un itinerario circular por Monte Alto, entrando polas Lagoas e saíndo pola praza de España.

Esta reordenación mellora as frecuencias e tempos de viaxe e supón unha alternativa para novos usuarios potenciais xa que a liña 11 dá servizo ao polígono da Grela desde o pasado mes de setembro, atendendo unha demanda histórica da asociación de empresarios e dos traballadores das máis de 500 empresas asentadas no polígono. Ademais, evítanse duplicidades de liñas en zonas xa servidas por outras liñas de bus urbano.

Liña 4

Esta liña mantén o itinerario habitual, aínda que á altura do centro de saúde de Santa Lucía dirixirase cara a Emilia Pardo Bazán e Marcial do Adalid, onde se incorporará a Federico Tapia. Os cambios non afectan as paradas actuais.

Liña 6

Será a gran novidade na reordenación do transporte público que entrará en funcionamento o vindeiro martes. A liña 6 percorrerá a rolda de Monte Alto, unha medida que, no marco do PMUS, atende e dá resposta a veciños e comerciantes desta zona do barrio de Monte Alto.

A solución analizada implica variar o itinerario: desde San Amaro, en lugar de seguir por Santo Tomás, continuará pola avenida de Navarra e rolda de Monte Alto para enlazar co seu itinerario habitual na avenida de Hércules, á altura do número 115.

As paradas deste novo trazado disporanse en Orillamar 96, avenida de Navarra-Rolda de Monte Alto, Rolda de Monte Alto 32, Rolda de Monte Alto 52, e avenida de Hércules 115. Disporanse de maneira provisional a fin de avaliar e confirmar a súa localización cos veciños e comerciantes da zona, converténdose entón en definitivas.