A CEP celebra un encontro de investidores emprendedores

A sede da Confederación de Empresarios de Pontevedra acollerá o I Encontro CEP de Investidores Emprendedores, cofinanciado polo IGAPE, a través do Fondo Social Europeo. Devandito evento terá lugar o vindeiro martes, día 11 de novembro, a partir das 10:00 horas.

Esta actividade, dirixida a emprendedores, investidores e empresarios, pretende establecer un punto de encontro a través do cal fomentar o espírito emprendedor, compartir coñecemento, información e novas iniciativas empresariais.

Expertos en diversos ámbitos empresariais estarán presentes neste acto: Jacobo García Durán, consultor de estratexia e operacións de Hansa, analizará os erros máis frecuentes que se adoitan cometer ao pór en marcha un novo proxecto empresarial; Álvaro Gómez Vieites, experto en innovación, TIC, sistemas de información e seguridade informática, dará as claves da mercadotecnia dixital para un emprendedor; e Luís Fernández, socio-fundador de InnoBAN, explicará o funcionamento dos business angels. O último relatorio correrá a cargo de Rodrigo Biel o cal, presentará un proxecto da Fundación Chile España dirixido a Start up.

Así mesmo, 7 emprendedores darán a coñecer as súas iniciativas empresariais mediante a técnica de presentación denominada elevator pitch. Este acontecemento será unha oportunidade para pór en contacto a emprendedores e investidores.

A asistencia a esta actividade é totalmente gratuíta. Os interesados en participar na mesma deben cubrir o formulario de inscrición que atoparán na web da Confederación de Empresarios de Pontevedra (<www.cep.es) e envialo por correo electrónico a relacionesinstitucionales@cep.es