A Carreira do San Martiño requerirá cortes de tráfico desde as 7 ata as 14 horas

Con motivo da celebración da 38 edición da carreira San Martiño, este domingo día 16 de novembro se cortará o acceso ao tráfico en diversas rúas da cidade. O primeiro corte de tráfico será a partir das 7 h na rúa Pardo de Cela, a Ponte do Milenio e a Glorieta Nexus VI. O segundo corte será desde as 10:30 h, pechando o tráfico ao resto do circuíto.

A Policía Local recomenda evitar circular ou acceder ao circuíto momentos antes dos horarios previstos nos cortes de tráfico. Se fose necesario circular, recomenda facelo polos seguintes itinerarios alternativos:

– Oira e Ponte novísimo para cruzar o Miño
– Polvorín, rúa Manuel Murguía e Farixa para a zona Sur-Oeste
– Barrio de San Francisco, rúa Nosa Sra. da Saínza para zona Sur-Este.

Horarios e circuítos

A proba celebrarase a partir das 11 horas, con tres percorridos: 10 km categoría adultos -saída ás 11 h-, 4,7 km escolares -saída ás 12:30 h- e 1,4 cativos -saída ás 13:15 h-.

O circuíto viario da categoría absoluta comprenderá as seguintes rúas: Ponte Milenio, Avenida Xesús Pousa, Praza Estación, Avenida das Caldas, Ponte Vella, Progreso, Tras Alameda, Dr. Flemin, Ervedelo, Avenida Portugal, Avenida Marcelo Macías, Avenida de Zamora, Bonhome, Galicia, Fernández-Oxea, Lugo, Padre Feijóo, Colón, Moratín, Obispo Carrascosa, Praza Maior, Lamas Carvajal, Paseo, Curros Enríquez, Avenida Habana, Cardenal Quevedo, Avenida Rodríguez Castelao, Avenida Otero Pedraio, Curros Enríquez, Ponte Nova, Avenida de Marín, Vicente Risco, Francisca Herrera, Avenida de Santiago, Avenida das Caldas, Ponte Vella e Pardo de Cela.

O viario escolar percorrerá: Ponte do Milenio, Basilio Álvarez, Avenida Caldas, Ponte Vella, Progreso, Avenida Pontevedra, Lamas Carvajal, Paseo, Curros Enríquez, Ponte Nova, Ribeira de Canedo, Ponte Vella e Pardo de Cela.

Máis de 10.000 inscritos

A presente edición conta con 10.968 inscritos: 5.172 en categoría absoluta, 3.761 en categoría escolar e 2.035 en cativos.

Como novidades, este ano, haberá un novo premio para os atletas que crucen en primeiro lugar na metade da proba (quilómetro cinco). Así mesmo, será a primeira edición con caixóns de saída, en función das marcas dos atletas na San Martiño 2013. Caixón negro para marcas inferiores a 35 minutos (homes) e 40 minutos (mulleres), vermello (entre 35 e 40 minutos) amarelo (entre 40 e 48 minutos) e verde, para o resto.