A aula Cemit de Poio programa cursos de alfabetización dixital para as vindeiras semanas

A Aula da Rede de Centros para a Modernización e Inclusión Tecnolóxica da Xunta de Galicia, Rede CeMIT, do Concello de Poio celebrará os seguintes cursos nas vindeiras semanas:

Do luns 17 ao mércores 19 celebrarase o curso “Uso da cámara dixital fotográfica”, co que se pretende que o usuario teña un coñecemento básico do manexo da cámara dixital de fotos. Explicaranse os conceptos básicos do uso da cámara de fotos dixital, os formatos de imaxe e as súas diferencias e como pasalas ao ordenador e organizalas.Os requisitos son: ter cámara de fotografías dixital e o cable de datos. Recoméndase tamén dispor do manual da cámara por se é necesario consultalo. Tamén e preciso ter coñecementos básicos no manexo de ordenador. O horario será de 10:00 a 11:30 horas.

Do luns 17 ao mércores 26 de novembro celebrarase o curso “Deseño de carteis e folletos con Scribus”. Permitirá aprender o manexo dun programa específico para o deseño de carteis, folletos e outros formatos de cartelería. Scribus é un programa de software libre e gratuíto co que poderemos crear deseños orientados a cartelería e folletos máis aló do que permite outro software como os procesadores de texto ou de presentacións, pero sen as complicacións do software especializado para deseño gráfico. Requírese coñecementos básicos de ordenador. O horario será de 17:00 a 18:30 horas.

Do luns 17 ao martes 25 impartirase o curso “Creación de presentacións en LibreOffice Impress”. As presentacións toman este nome ao estar orientadas a presentar calquera información de maneira visual e directa, centrándose nos datos e ideas máis importantes e así poder destacalos para darlle relevancia. Deste xeito conséguese que simplemente vendo a diapositiva podamos entender rapidamente as ideas principais do asunto que se está a explicar. O programa LibreOffice Impress forma parte da suite ofimática LibreOffice, este software é gratuíto e de libre uso, polo que calquera o pode descargar e instalar no seu ordenador. Aprenderemos como crear presentacións básicas, técnicas para atraer a atención a información que desexemos destacar e daranse consellos sobre a creación de presentacións. Os requisitos son ter coñecementos básicos de manexo do ordenador. O horario será de 19:00 a 20:30 horas.

Aula Aberta: Os horarios de Aula Aberta, de acceso libre á aula, aos equipos e á conexión wi-fi, son seguintes:

– Luns 10 ao mércores 12 de 10:00 a 12:00 horas.

– Luns 10 ao venres 14 de 17:00 a 18:30 horas.

– Xoves 27 ao mércores 28 de 10:00 a 12:00 horas.

A Rede CeMIT da Xunta de Galicia configúrase como o instrumento fundamental para promover a alfabetización dixital da sociedade galega. A Rede CeMIT ten como obxectivo potenciar actuacións relacionadas co desenvolvemento da actividade económica, empresarial e da implantación dos servizos electrónicos, titorizando a cidadanía con maiores dificultades e proporcionándolles os medios e ferramentas necesarios para poder formar parte activa da Sociedade da Información.

Para inscribirse ou para solicitar máis información sobre as citadas actividades poden dirixirse ao Aula CeMIT de Poio sita en Carreiro do Campo, 17. Combarro. 36993 – Poio, a través da páxina web https://cemit.xunta.es/, chamar ao teléfono 986770001 (Ext. 321) ou enviar un correo electrónico ao enderezo: cemit.poio@xunta.es