A Asemblea de Movementos Sociais de Vigo trasládase a Santiago para reunirse co Valedor do Pobo

PUBLICADO EN: Noticias de Galicia ► Vigo ▼
A-
A+

O grupo exporá mañá por medio de testemuños de afectados por colapso de axudas municipais de emerxencia, a realidade do departamento de Benestar do concello de Vigo. Membros da Asemblea explicarán ao coordinador Fernando de Andrés Alonso como o atraso do cobro das axudas pode chegar aos once meses. Así mesmo entregaráselle ao Valedor un informe onde se reflictan as necesidades do departamento desde o punto de vista dos afectados, concretamente facendo fincapé nun aumento do persoal de Benestar, que soamente conta con dezasete traballadoras sociais, as mesmas que hai semanas acudiron ao mesmo organismo a denunciar o abandono que os máis necesitados sofren polo departamento.

Entre outras cousas, a Asemblea quere chamar a atención sobre o feito de que se desatenda a peticiòn desesperada do propio persoal de requirir apoio no departamento, que foi desatendida polo propio alcalde, debendo acudir ao Valedor para solicitar unha investigación respecto diso, na cal a AMSV ofrécese a colaborar con datos e testemuños en apoio ao persoal de benestar, que ten unhas cotas preocupantes de baixas por depresión.

30 de novembro de 2014 | 20:39 • Sen comentarios

Comentarios pechados.