80 persoas condenadas a servizos da comunidade cumpriron a súa pena en centros da Deputación de Pontevedra

A Deputación de Pontevedra acolle mañá unhas xornadas sobre a xestión da pena de traballos en beneficio da comunidade, nas que participarán traballadores sociais, responsables de entidades sociais e diferente persoal técnico de concellos e asociacións que colaboran co Ministerio de Interior no programa de medidas alternativas á prisión.

O obxectivo é explicarlles polo miúdo os procedementos específicos da xestión das condenas a traballos en beneficio da comunidade a aquelas institucións e organismos que, na actualidade, colaboran neste labor, así como animar os que aínda non participan nestes programas a que se sumen a eles.

Na provincia de Pontevedra son 60 os concellos que participan nesta iniciativa, así como a Deputación de Pontevedra e máis de medio cento de entidades sen ánimo de lucro.

A Deputación colabora desde o ano 2009 neste programa por medio dun convenio marco co Centro Penitenciario da Lama, facilitándolles o cumprimento das súas condenas neste tempo a 80 persoas, con resultados moi satisfactorios.

Cada ano son unhas 15 as persoas que se destinan a diferentes centros da Administración provincial, coma Príncipe Felipe, Servizo de Patrimonio Documental e Bibliográfico, Museo ou Areeiro, onde desenvolven sobre todo labores de mantemento e limpeza.

Os resultados desta colaboración entre o Ministerio do Interior e os concellos da provincia serán analizados na xornada de mañá, que abrirá o subdirector xeral adxunto de Penas e Medidas Alternativas, Miguel Ángel Vicente Cuenca.

A xornada terá lugar entre as 10:00 e as 14:00 h no salón de actos do Edificio Administrativo da institución provincial.