Verín conmemora o ‘Día da Biblioteca’

O vindeiro venres 24 de outubro, de 18 a 19.30 horas, a Biblioteca Pública Municipal de Verín programa a iniciativa ‘Día da Biblioteca’, no marco da programación de actividades destinadas ao fomento da lectura e dinamización da instalación municipal.

A mesma está destinada a un máximo de 20 nenos/as socios/as da instalación, con idades comprendidas entre os 3 e 9 anos. Permitirá conmemorar a efeméride do ‘Día da Biblioteca’ entre os/as socios/as máis novos/as das instalación cultural verinense, e consistirá na realización de contacontos e dúas manualidades realizadas con materiais naturais: vaca recipiente e marcapáxinas -os/as participantes deberán traer un cartón de leite limpo cortado á metade-.

Para participar é necesario inscribirse na propia biblioteca ou no teléfono 988-414776. Trátase da quinta actividade do curso escolar que se desenvolverá na Biblioteca de Verín, e conta coa colaboración do persoal da instalación e mozos/as voluntarios que durante o ano realizan actividades de Fomento da Lectura na instalación municipal, e que xa foron recoñecidas, durante cinco anos consecutivos, na Campaña de Animación á Lectura María Moliner, co nomeamento como Biblioteca Asociada pola UNESCO, e co premio á Mellor Iniciativa ao Fomento da Lectura para Bibliotecas Públicas 2011, concedido pola Federación de Gremios de Editores de España-.