Un grupo de voluntarios participan en Santiago nun curso para acompañar e axudar a mulleres vítimas de violencia de xénero

Alfonso Rueda na inauguración do curso

O Centro de Recuperación Integral (CRI) para mulleres vítimas de violencia de xénero de Santiago acollerá durante 10 días un curso destinado a 15 voluntarios que aprenderán as claves para axudar e acompañar a mulleres nesta situación, co obxectivo de polo en práctica no propio centro.

O vicepresidente da Xunta, Alfonso Rueda, a secretaria xeral de Igualdade, Susana López Abella, e o director xeral de Xuventude e Voluntariado, Ovidio Rodeiro, participaron este luns na inauguración da primeira das sesións deste curso, que contará cun total de 25 horas formativas.

Os 15 voluntarios que participarán nesta formación incorporaranse posteriormente ao traballo do Centro de Recuperación Integral, aínda que “sen substituír ningún posto de traballo”, explicou Ovidio Rodeiro. A idea é que estes voluntarios realicen tarefas de “colaboración” no desenvolvemento diario do centro e de “acompañamento” das mulleres á hora de facer actividades, xestións ou trámites.

Pola súa banda, Alfonso Rueda explicou que a loita contra a violencia de xénero é “un dos grandes retos para a sociedade” a día de hoxe e comprometeu o apoio da Xunta, que aumentará nun 17 por cento en 2015 a dotación para axudas para mulleres vítimas.

IMPLICACIÓN DA SOCIEDADE

Con todo, Rueda lembrou que “só coas medidas da Administración non é suficiente” e apuntou que, para a erradicación desta secuela, é necesaria a “implicación de toda a sociedade”.

Paralelamente, sinalou que se trata dunha problemática “complexa”, polo que é necesario “formarse” no seu tratamento. Nesta liña, agradeceu aos participantes no curso a súa “implicación” e a súa participación nunha iniciativa que lles permitirá “ter claro desde o principio cales son as súas tarefas”.