O rexedor de Baralla cre que a explosión no consistorio foi evidentemente intencionada

O alcalde do municipio lucense de Baralla, Manuel González Capón, sostivo que a explosión rexistrada esta madrugada na casa consistorial foi “evidentemente” intencionada, posto que “tivo lugar na entrada, pola parte de dentro”.

A explosión produciuse en torno ás 4.40 horas da madruga e a onda expansiva afectou ata unha distancia de corenta metros, provocando estragos na casa do concello e nas casas adxacentes. Non houbo que lamentar danos persoais.

“Estamos indignados, porque isto non ten sentido”, asegurou o alcalde popular, que hai un ano ocupou as páxinas dos diarios por dicir, durante un pleno municipal, que as vítimas do franquismo “o merecían”, aínda que días despois pediu perdón por estas polémicas declaracións.

O alcalde, que vive a cen metros da Casa Consistorial, espertou coa explosión, que puido oirse a catro quilómetros de distancia.

A Garda Civil abriu unha investigación para tratar de determinar se a explosión se produciu a raíz dun artefacto explosivo. Os artificieros chegaron á Casa Consistorial en torno ás 7.30 horas deste mércores.