O deseñador David Carson impartirá un taller na Coruña no marco do proxecto Cidea

O alcalde da Coruña na benvida a David Carson

O alcalde da Coruña, Carlos Negreira, recibiu no Palacio Municipal de María Pita a David Carson (Corpus Christi, Texas, 1954), considerado como o deseñador gráfico máis influente nos anos noventa. Carson impartirá un taller os días 31 de outubro e 1 e 2 de novembro na Fundación Luís Seoane, no marco do proxecto CIDEA, promovido polo Concello, e ofrecerá unha conferencia o día 1, gratuíta e de entrada libre, ás 19.30 horas, no Paraninfo do Reitorado da Universidade da Coruña.

Interesado en coñecer as claves artísticas da cidade e en reflexionar sobre como pode desenvolverse nun futuro o proxecto CIDEA, visitou durante o día de onte as principais claves loxísticas do denominado Distrito Creativo, que nace coa intención de transformar o centro histórico e a súa contorna —o que coñecemos como Cidade Vella e Pescadería— nun espazo activo de creación e coñecemento: a Fundación Luís Seoane, o Reitorado da Universidade, o complexo de edificios que albergará CIDEA e a Escola de Arte e Superior de Deseño Pablo Picasso. Acompañado pola concelleira de Cultura, Ana Fernández e o director da Fundación Luís Seoane, David Varro, Carson tamén visitou o Concello onde foi recibido polo alcalde da cidade, Carlos Negreira, para poder departir achega do proxecto CIDEA, achegando a súa experiencia no campo creativo.

A obra de David Carson proporcionou aos anos noventa unha imaxe totalmente nova desde un punto de vista estético grazas ao uso transgresor que fixo da tipografía, sobre todo a partir do seu traballo como director artístico da revista de música alternativa Ray Gun. Aínda que o periplo profesional de David Carson comeza na década do setenta: tras licenciarse en socioloxía, impartirá clases durante cinco anos nun instituto de California, mentres practicaba unha das súas grandes paixóns, o surf, chegando a estar situado entre os dez mellores surfeiros do mundo. Durante o verán de 1980, asistiría a un taller de deseño gráfico de dúas semanas que lle cambiaría a vida por completo, o que o levaría a realizar estudos de arte no Oregon College of Commercial Art. Tras o seu paso por Suíza, onde recibiría clases do deseñador, editor e mestre da tipografía Hans-Ruldolf Lutz, regresa ao seu país natal, onde comezará unha importante traxectoria como director artístico de diferentes publicacións relacionadas co skate e o surf como Transworld Skateboarding Magazine, Transworld Snowboarding ou Beach Culture, nas que comeza a experimentar coa tipografía e a perfilar un estilo que, posteriormente, identificaríase co movemento grunge. A principios da década dos 90, o traballo como deseñador de David Carson farase mundialmente coñecido grazas ao seu labor como director artístico na revista de música e cultura alternativas Ray Gun, na que gozará de total liberdade creativa, prescindindo de elementos básicos como a retícula, o emprego de marxes ou a paxinación, pero sobre todo dotando á tipografía dun protagonismo absoluto, radical e renovador, mesturando e investindo tipos, xogando co interlineado e os espazos, desprazando de maneira aparentemente arbitraria os cadros de texto ou eliminando calquera tipo de estrutura clásica.

David Carson Design, realizou traballos para Pepsi-Cola, Budweiser, Western Union, Levi’s, British Airways, Nike, Quicksilver, Sony, Nissan, Bose, MTV, Ray Ban ou Sony, entre outras, e continuará deseñando libros, portadas para revistas, etc. En 2014, recibe a medalla do AIGA, a distinción máis importante para un deseñador gráfico nos Estados Unidos. Na actualidade, a súa obra continúa sendo fonte de inspiración para deseñadores de todo o mundo.