O Concello da Coruña saca a concurso a modernización da iluminación pública do paseo marítimo

O Concello licita a modernización da iluminación do paseo marítimo, á altura das praias de Riazor e Orzán, dentro do seu plan de mellora de espazos públicos e da imaxe da cidade. O proxecto conta cun orzamento de 1.319.470 euros e un período máximo de execución de 4 meses.

O anuncio deste novo concurso publicouse hoxe, mediante procedemento aberto, no Diario Oficial de Galicia (DOG). Esta obra de modernización de espazos públicos da cidade que programou a Concellaría de Infraestruturas aprobouse na última Xunta de Goberno Local e permitirá a mellora eficiente da iluminación no paseo marítimo e a súa contorna no tramo entre As Lagoas e San Roque. O prazo para presentar propostas é de 26 días naturais contados a partir de mañá e a documentación do proxecto pódese consultar no perfil do contratante da páxina web municipal.

O novo proxecto da Concellaría de Infraestruturas recolle unha serie de vantaxes que tamén permitirán mellorar a imaxe deste punto emblemático da cidade polo que transitan a diario miles de peóns e condutores:

– Modernización da iluminación grazas á colocación de luminarias altamente eficientes de tecnoloxía LED e que substituirán ás que existen actualmente e que se atopan obsoletas. En concreto, substituirase e mellorará a eficiencia de 442 puntos de luz e instalaranse 16 novas columnas metálicas.

– O uso de tecnoloxía de última xeración suporá unha redución do gasto enerxético, así como un aumento da vida útil dos equipos e un aforro do investimento necesario en tarefas de mantemento e reposición. Ademais, colocaranse cinco novos centros de mando que velarán polo correcto funcionamento do servizo (un sistema de control remoto informará puntualmente do estado da rede de iluminación do paseo).

– Incremento da seguridade viaria, pois o proxecto inclúe a instalación de iluminación non só no paseo marítimo e na zona das praias de Riazor e Orzán, senón tamén no sistema viario, as rotondas e no carril bici, ademais de reforzar a iluminación da coraza das Escravas e o embarcadoiro de San Roque.

O proxecto non só complementa todos os traballos recolleitos no concurso de ideas para a reordenación do bordo litoral da cidade, senón que ademais enmárcase dentro da aposta do actual equipo de goberno polo plan de mellora e modernización da rede de iluminación pública. Así, no orzamento deste ano, a área de Infraestruturas dispón de máis de 6 millóns de euros para alcanzar unha maior eficiencia enerxética e para continuar co plan municipal de remodelación da iluminación. O novo proxecto do paseo marítimo súmase a outras intervencións xa executadas en 2014 en materia de iluminación pública noutros puntos da cidade, como Os Rosales, a avenida de Rubine e a praza de Casares Quiroga, ou nos parques da Torre, Carlos Casares e Bens.