O alcalde de Santiago asegura que Currás ten todo o dereito a aceptar liderar Tragsa

O alcalde de Santiago, Agustín Hernández, rexeitou este luns comentar a elección do seu antecesor no cargo, Ángel Currás, como delegado da empresa pública Tragsa en Galicia; pero sinalou que, como “profesional” que é, ten “todo o dereito do mundo” a aceptar este posto.

“Non fago ningunha valoración sobre unha decisión persoal. El fixo a transferencia da Alcaldía cara á miña persoa e, a partir diso, toma as decisións que considera convenientes”, resolveu, a preguntas dos xornalistas tras unha visita ao barrio de Sar, o rexedor compostelano.

Cuestionado sobre se, como número tres do PPdeG, cre que a sociedade entende que se elixa para dirixir unha empresa pública unha persoa sobre a que pesan dúas imputacións por tráfico de influencias na Operación Pokémon e por prevaricación e acoso moral a un policía local, resolveu: “É unha cuestión que non vou valorar”.

Así, o único que dixo é que Currás “é un profesional que ten todo o dereito do mundo a atopar a súa mellor dedicación profesional” e deixou en mans dos cidadáns da capital galega a análise desta decisión nas próximas eleccións.

A liña seguida, Agustín Hernández apelou á necesidade de “respectar a presunción de inocencia de todo o mundo”, tanto dos membros do PP coma “do resto dos partidos”. “Eu fíxeno e penso facelo sempre”, sostivo.

“NON” QUITA UN PESO DE ENRIBA

En canto ás críticas da oposición á recolocación do exalcalde de Santiago nun posto público no que podería cobrar máis de 100.000 euros anuais, Hernández tampouco quixo responder. “É o que di a oposición, o que eu tiña que dicir xa díxeno”, apostilou.

De igual modo, preguntado sobre se a súa marcha supón para el quitar un peso de enriba, dixo que “non” quita “ningún peso de ningún sitio”, pois Currás “é concelleiro e traballa dentro do equipo de Gobierno”; e tamén respondeu que “non” entende o seu nomeamento “como nada”, ao ser inquirido sobre se se trata dun premio por parte do PP.

E, despois de que o vicepresidente da Xunta e secretario xeral do PPdeG, Alfonso Rueda, aseverase que a saída de Currás do Pazo de Raxoi supón “o peche dunha etapa”, o rexedor optou por reivindicar a súa xestión dende que asumiu o bastón de mando, o pasado mes de xullo.

“A miña primeira obriga cando cheguei ao concello foi intentar introducir normalidade na xestión, e creo que iso está conseguido nunha porcentaxe importante”, resaltou Agustín Hernández, antes de opinar que aos compostelanos lles tocará “valorar esa xestión” na próxima cita coas urnas, en maio do ano próximo.

Neste punto, acerca de se concorrerá como candidato ás eleccións municipais, volveu dicir que será o seu partido o que decida “de acordo cos seus estatutos e cos tempos que manexa para as grandes cidades”. “Eu estiven e estarei a disposición do PP”, remarcou.

SEN “DÍA CONCRETO” PARA A SÚA MARCHA

En canto aos prazos para a marcha de Currás do concello, explicou que o exalcalde –quen lle trasladou a “posibilidade” de asumir ese cargo “hai uns días”– non o informou do “día concreto” en que se produciría. “Supoño que será dentro dun breve prazo, pero non teño data”, engadiu.

Sobre o seu substituto, que terá que ser outro concelleiro non electo –e serían oito de 13–, asegurou que aínda “non” baralla ningún nome. “Dedícome a xestionar a cidade (…). Cando teña a renuncia de Currás adoptarei a decisión, como fixen no seu día”, indicou o primeiro edil de Santiago.

“Estou preocupado polos temas da cidade; cando chegue o momento adoptarei a decisión o máis rápido posible, intentando acertar e buscar a persoa axeitada”, sinalou, antes de avanzar que busca alguén con “vocación de servizo á cidade”, ao igual que o resto de integrantes do seu equipo.